Nëse jeni si shumica e prindërve, kur sëmureni nuk mund t’i lini mënjanë përgjegjësitë prindërore. Me shumë gjasa vazhdoni të kujdeseni për gjithçka, edhe pse nuk ndiheni mirë, derisa gjendja juaj përkeqësohet. Por, në fakt, rregulli numër një kur jeni të sëmurë është shumë i thjeshtë: pushoni.
Prandaj, çelësi i prindërimit gjatë kohës që jeni të sëmurë është të hiqni dorë nga standardet e larta dhe ndjenja e fajit. Tregojuni fëmijëve: “Sot nuk ndihem mirë, jam vërtet i/e sëmurë”, dhe ndihmojini të kuptojnë se keni nevojë për bashkëpunimin e tyre që të mund të pushoni.
“Ne përpiqemi të jemi superheronj dhe ta fshehim sa keq ndihemi,” thotë Marcie Beigel, EdD, eksperte për sjelljen e fëmijëve në New York. “Mendojmë se fëmijët e vegjël nuk do ta kuptojnë, por do të habiteni sa shumë janë në gjendje ta kuptojnë situatën.”
Kam biseduar me prindër që e kanë zotëruar artin e të bërit minimumin e nevojshëm, duke i mbajtur njëkohësisht fëmijët të sigurt, të ushqyer dhe të qetë. Ja disa nga sekretet e tyre për t’ia dalë mbanë kur jeni të sëmurë dhe për t’u rikuperuar më shpejt.
Pushoni sa më shumë
Kur jeni të sëmurë, është ideale që fëmijët të kalojnë të paktën një pjesë të ditës duke luajtur qetësisht vetë, në mënyrë që ju të mund të pushoni. Si mund ta arrini këtë? Ja disa ide.
Mbani një “thesar” të fshehtë
Kur jeni mirë, krijoni një rezervë me lodra të vogla, lojëra, materiale vizatimi ose sende të tjera të reja dhe interesante dhe ruajini diku larg syve të fëmijëve.
Këtë bëri edhe Bailey Gaddis nga Kalifornia. Ajo mban në dollap një çantë me lodra të vogla dhe surpriza për djalin e saj 4-vjeçar. “Meqenëse çanta del vetëm në raste të rralla, gjithçka brenda saj i duket e re dhe e mban të angazhuar për orë të tëra,” thotë ajo.
Këshillë: Nëse nuk keni planifikuar më parë, mund të përdorni dhurata që i kishit ruajtur për raste të veqanta, ose të gjeni objekte të sigurta nga kuzhina që fëmija nuk i sheh zakonisht, veçanërisht nëse është nën moshën 2-vjeçare.
Zgjidhni lojëra që kërkojnë pak energji
Herët a vonë, fëmijët do të kërkojnë vëmendjen tuaj. Kur të ndodhë kjo, zgjidhni lojëra që kërkojnë shumë pak angazhim nga ana juaj. Mund të luani “doktori dhe pacienti” ose “spitali”. Një nënë tregon se gjatë shtatzënisë, kur vuante nga të përzierat, luante lojën “Natën e mirë” me vajzën e saj. Vajza e mbulonte me batanije, i “lexonte” libra dhe i fliste vazhdimisht. Për fëmijën ishte argëtim, ndërsa për nënën ishte një mundësi për të pushuar.
Krijoni një mini-poligon në shtëpi
Kur edhe kjo lojë të humbasë interesin, krijoni sfida të vogla fizike.
Jepuni udhëzime si:
- “Preke derën!”
- “Kalo poshtë karriges!”
- “Bëj tre kërcime!”
Ju mund t’i matni me kohë nga krevati dhe t’i sfidoni të përmirësojnë rezultatin e tyre. Fëmijët zakonisht e shijojnë shumë këtë lloj loje.
Organizoni një “gjueti thesari”
Një tjetër ide është t’u kërkoni fëmijëve të gjejnë objekte të ndryshme nëpër shtëpi.
Për shembull:
- një peshqir me vija,
- çorapet portokalli të babait,
- një libër me kopertinë blu.
Kur t’i kenë gjetur të gjitha, kërkojuni t’i vendosin sërish në vendin ku i morën. Si shpërblim mund të marrin një histori shtesë para gjumit ose një aktivitet të preferuar.
Shndërrojeni ekranin në shpërblim
Një mënyrë efektive është t’u thoni fëmijëve se nëse luajnë së bashku pa u grindur ose pa u ankuar për 20–30 minuta, do të fitojnë kohë për të parë një film vizatimor ose emisionin e tyre të preferuar.
Nëse fillojnë të zihen, matësi i kohës rifillon nga e para.Kjo i ndihmon të luajnë më gjatë në mënyrë të pavarur, ndërsa ju fitoni kohë për t’u çlodhur. Pediatrja Michelle Davis-Dash thotë se kjo strategji është e pranueshme, për sa kohë që qëllimet janë të arritshme. Megjithatë, nëse e dini se sfida vetëm do të shkaktojë më shumë stres, ndizeni televizorin pa e kthyer në garë.
Ruajeni ekranin për më vonë gjatë ditës
Nëse është e mundur, shmangni ekranet në orët e paradites. Sipas terapistes familjare Allison LaTona, fëmijët janë më krijues dhe më të prirur për lojë të pavarur në mëngjes. Ajo sugjeron gjithashtu të alternoni filmat vizatimorë shumë stimulues me përmbajtje më të qeta, si dokumentarë për natyrën ose emisione gatimi që mund t’i shikoni së bashku.
Zgjidhni përmbajtje që i angazhon
Mos harroni se jo çdo kohë para ekranit është e njëjtë. Ka kanale dhe aplikacione që i përfshijnë fëmijët në aktivitete vizatimi, krijimtarie apo mësimi praktik. Këto mund të jenë një alternativë më e dobishme sesa shikimi pasiv i videove.
Pavarësisht se çfarë zgjidhni, shpjegojuni fëmijëve se rregullat e ditës kur jeni të sëmurë janë të përkohshme dhe se sapo të ndiheni më mirë, rutina e zakonshme do të rikthehet. Më pas, përpiquni t’i qëndroni këtij plani sa më shumë që të jetë e mundur.
