Me afrimin e shtatorit, në shumë familje kosovare fillon i njëjti ritëm: blihen çantat, fletoret, lapsat, rrobat e reja dhe bëhen planet për vitin shkollor. Por përgatitja për shkollë nuk përfundon te lista e blerjeve. Ndonjëherë, pikërisht në përpjekjen për t’i përgatitur sa më mirë, prindërit bëjnë disa gabime që mund t’ia vështirësojnë fëmijës fillimin e vitit. Prandaj, para fillimit të mësimit, flisni me fëmijën për emocionet, miqësitë, ndarjen e lodrave, kërkimin e ndihmës dhe mënyrën se si mund të reagojë kur diçka nuk i shkon mirë.
Gabimi i parë: Ta ndryshojmë rutinën brenda një nate
Pas një vere me orare më të lira, është joshëse t’i themi fëmijës disa ditë para shkollës: “Tani duhet të flesh herët!” Por trupi i fëmijës ka nevojë për kohë për t’u përshtatur. Filloni gradualisht të afroni orarin e gjumit dhe të zgjimit. Rutinat e qëndrueshme për gjumin, ushqimin dhe lojën janë pjesë e rëndësishme e zhvillimit të shëndetshëm.
Gabimi i tretë: Krahasimi me fëmijët e tjerë
“Shoku yt i di të gjitha këto.” “Vajza e komshies tashmë lexon.” Krahasimet mund të krijojnë ankth dhe ta bëjnë fëmijën ta shohë shkollën si garë, jo si mundësi për të mësuar. Fëmijët zhvillohen me ritme të ndryshme dhe gatishmëria shkollore nuk është një standard i vetëm për të gjithë. Në vend të krahasimit, pyesni: “Çfarë mund të bëjmë së bashku që këtë vit të ndihesh më i sigurt?”
Gabimi i katërt: T’i frikësojmë me shkollën
Shprehje si “Në shkollë nuk do të të tolerojë askush” ose “Mësuesja do të të qortojë nëse nuk mëson” mund të krijojnë frikë para se fëmija ta ketë përjetuar realisht shkollën. Flisni për mësuesin, shokët dhe detyrat me një gjuhë që krijon siguri. Fëmija duhet ta kuptojë se vështirësitë janë pjesë normale e të mësuarit.
Gabimi i pestë: Të bëjmë gjithçka në vend të tij
Prindi mund t’ia përgatisë çantën, t’ia zgjedhë rrobat, t’ia rregullojë tavolinën dhe t’ia kontrollojë çdo gjë. Por pavarësia mësohet përmes praktikës. Lëreni fëmijën të përgatisë vetë çantën, të zgjedhë disa materiale, të vendosë rrobat dhe të mësojë të organizojë gjërat e tij sipas moshës.
Si ta bëjmë kthimin në shkollë më të lehtë?
Në ditët para fillimit, krijoni një mini-rutinë shkollore: zgjim në orar të përafërt, mëngjes i qetë, pak lexim, aktivitet fizik dhe përgatitje të çantës në mbrëmje. Shkoni së bashku për të parë materialet, flisni për atë që e emocionon dhe për atë që e shqetëson. Mbi të gjitha, mos kërkoni një fëmijë “perfekt” në ditën e parë. Qëllimi nuk është që ai të hyjë në klasë duke ditur gjithçka, por të hyjë me siguri, kuriozitet dhe gatishmëri për të mësuar.
Shkolla fillon në shtator, por përgatitja më e mirë për të fillon në shtëpi — me rutinë, biseda, besim dhe një marrëdhënie ku fëmija e di se mund të kërkojë ndihmë.
Prinderimi.com
