Republika e Kosovës
Qeveria – Ministria e Arsimit, Shkencës, Teknologjisë dhe Inovacionit
Në mbështetje të nenit 18 të Ligjit për Arsimin Parauniversitar në Republikën e Kosovës (Gazeta zyrtare nr. 17, 16 shtator 2011), neni 8 paragrafi 1 nënparagrafi 1.4, shtojca 1 paragrafi 7 i Rregullores (QRK) nr. 02/2021 për fushat e përgjegjësisë administrative të Zyrës së Kryeministrit dhe Ministrive të datës 30.03.2021, nxjerr:
Neni 1 – Qëllimi
Ky Udhëzim përcakton dhe rregullon procedurat e themelimit, rolin, detyrat dhe funksionalizimin e Këshillit të Nxënësve (KN) në arsimin e mesëm të ulët dhe të mesëm të lartë në Republikën e Kosovës.
Neni 2 – Fushëveprimi i KN
- Këshilli i Nxënësve, është strukturë përfaqësuese e nxënësve të cilët përfaqësojnë, mbrojnë dhe avokojnë për interesat, nevojat dhe të drejtat e nxënësve në nivel shkolle, komune dhe nacional.
- Këshilli i Nxënësve, siguron pjesëmarrjen e nxënësve në organe dhe procese vendimmarrëse të shkollës.
Neni 3 – Shkurtesat
- Shkurtesat e përdorura në këtë Udhëzim administrativ kanë këto kuptime:
- KN – Këshilli i Nxënësve;
- KDSH – Këshilli Drejtues i Shkollës;
- MASH – Ministria e Arsimit, Shkencës, Teknologjisë dhe Inovacionit;
- DKA – Drejtoria Komunale e Arsimit.
Neni 4 – Themelimi i Këshillit të nxënësve
Këshilli Drejtues i Shkollës (KDSH) inicion dhe themelon Këshillin e nxënësve (KN) në nivel shkolle.
Neni 5 – Roli dhe detyrat e Këshillit të nxënësve
- Përfaqëson zërin e të gjithë nxënësve në strukturat e tjera të shkollës dhe jashtë saj, për plotësimin e interesave të komunitetit të nxënësve për mbrojtjen e të drejtave të tyre dhe për një arsimim sa më cilësor.
- Përfaqëson pikëpamjet e nxënësve dhe promovon frymën demokratike brenda shkollës.
- Merr pjesë në grupet punuese për hartimin e Planit Zhvillimor të Shkollës si dhe në hartimin e politikave shkollore të cilat duhet miratuar edhe nga KDSH.
- Shërben si mekanizmi kryesor i komunikimit mes shkollës dhe nxënësve dhe mbron interesin për mirëqenien e nxënësve.
- Orienton dhe këshillon nxënësit e ri në shkollë.
- Merr rol aktiv në ngjarjet kulturore dhe organizon aktivitete jashtëkurrikulare.
- Merr rol aktiv në inicimin e themelimit të klubeve, organizimin e garave dhe aktiviteteve tjera me interes për nxënësit dhe shkollën.
- Ndërvepron me të gjitha subjektet e shkollës në interes të cilësisë së mësimdhënies dhe mësimnxënies.
- Shërben si mbikëqyrës që përfaqësimi gjinor, etnik dhe i grupeve të cenueshme të respektohen.
- Punon dhe angazhohet në përmirësimin e mjedisit mësimor dhe kushteve të punës, përfshirë interesat për shëndetin, sigurinë dhe mirëqenien e tyre.
- Anëtarët obligohen të ndajnë vendimet dhe njoftimet me nxënësit e klasave të veta.
Neni 6 – Struktura e Këshillit të Nxënësve
- KN përbëhet nga një kryetar/e i/e secilës klasë të shkollës.
- Të drejtë vote për vendimet e KN kanë kryetarët/et e klasave si anëtar të KN. Nënkryetari/ja e përfaqëson klasën në rast të mungesës së kryetarit.
- Anëtarët e KN, përmes votës së fshehtë zgjedhin kryesinë e Këshillit të Nxënësve të shkollës.
- Kryesinë e KN, në shkollat e mesme të ulëta, e përbëjnë shtatë (7) anëtarë, të cilët zgjidhen nga anëtarët e KN, si përfaqësues të nxënësve.
- Kryesinë e KN, në shkollat e mesme të larta, e përbëjnë pesë (5) anëtarë, të cilët zgjidhen nga anëtarët e KN, si përfaqësues të nxënësve.
- Kryetari/ja dhe nënkryetarët e shkollës zgjidhen me anë të votave nga përfaqësuesit e secilës klasë në shkollë dhe bëhen pjesë e kryesisë së KNSH.
- 6.1. Në shkollat e mesme të ulëta nxënësi/ja, më i/e votuar, merr pozitën e kryetarit/es së shkollës dhe dy (2) nxënësit e dytë më të votuar, marrin pozitën e nënkryetarëve të shkollës.
- 6.2. Në shkollat e mesme të larta nxënësi/ja, më i/e votuar, merr pozitën e kryetarit/es së shkollës dhe nxënësi/ja e dytë më i/e votuar, merr pozitën e nënkryetarit/es së shkollës.
- Përfaqësuesit e klasave të një paraleleje (gjenerate), zgjedhin një (1) përfaqësues të paraleles, pas zgjedhjes së pozitave të kryetarit dhe nënkryetarit të KN.
- Përfaqësuesit e zgjedhur të secilës paralele, në mënyrë direkte janë pjesë e kryesisë së KN.
- Të përzgjedhurit për pozitën e kryetarit dhe nënkryetarit, obligohen të dorëhiqen nga pozitat e përfaqësuesve të klasave dhe paraleleve.
- Në shkollat që ka nxënës nga grupet e cenueshme, një nxënës përfaqëson dhe mbron interesat e grupeve të cenueshme.
- Kryesia e KN, zgjedh nga anëtarët e vet një arkëtar dhe sekretar.
- Kryesia e KN mund t’ju përcaktojë anëtarëve të tjerë detyra dhe përgjegjësi, varësisht nevojave të kryesisë.
- Kryesia e KN së bashku me anëtarët krijojnë planin vjetor të punës në muajin e parë pas themelimit.
- Kryesia takohet së paku 6 herë në vit.
- Takimet e kryesisë së KN i udhëheq kryetari/ja, në mungesë të tij/saj takimet udhëhiqen nga nënkryetari/ja.
- Kryesia sipas nevojës në takime fton si këshillëdhënës, mësimdhënës, drejtorin, përfaqësues të prindërve apo ekspert tjerë.
- Kryesia e KN ka të drejtë që të themeloj grupe punuese për nevojat e nxënësve të shkollës të cilat propozohen dhe votohen në takimet e KΝ.
- Iniciativat dhe propozimet që dalin nga përfaqësuesit e KN miratohen nga kryesia e KN.
- Vendimet e kryesisë së KN, merren me anë të votimit të hapur dhe vlen parimi i shumicës së thjeshtë (50+1) nga të gjithë anëtarët me të drejtë vote.
- Nëse ndonjëri/a nga anëtarët e KN nuk është aktiv, mungon në takimet dhe aktivitetet e KN, apo shkel rregullat dhe politikat e shkollës, largohet nga kryesia dhe zëvendësohet me një nxënës tjetër i cili është nënkryetar i klasës.
- KN në nivel komunal përbëhet nga kryetarët e KN-ve të të gjitha shkollave në komunën përkatëse.
- 21.1. Anëtarët e KN në nivel komune, përmes votës së fshehtë zgjedhin kryesinë e Këshillit të Nxënësve të komunës.
- 21.2. Kryesia e KN në nivel komune përbëhet prej, pesë (5) anëtarë të cilët zgjidhen nga anëtarët e KN, si përfaqësues të shkollave.
- KN, në nivel nacional përbëhet nga kryetarët e KN të secilës komunë.
- 22.1. Anëtarët e KN nacional, përmes votës së fshehtë zgjedhin kryesinë e Këshillit të Nxënësve në nivel nacional.
- 22.2. Kryesinë e KN në nivel nacional e përbëjnë, pesë (5) anëtarë të cilët zgjidhen nga anëtarët e KN, si përfaqësues të komunave.
Neni 7 – Zgjedhjet dhe mandati i anëtarëve
- Themelimi i KN duhet të filloj në muajin e parë të çdo viti të ri shkollor. KN duhet të jetë i konsoliduar më së largu deri në fund të muajit të parë të fillimit të vitit shkollor.
- 1.1. Zgjedhjet e KN në nivel klase dhe shkolle duhet të bëhen në mënyrë demokratike dhe me anë të votës së fshehtë dhe vlen parimi i shumicës së thjeshtë (50+1) nga anëtarët me të drejtë vote.
- 1.2. E drejta për të zgjedh dhe për tu zgjedhur duhet t’i takoj secilit nxënës/e të shkollës pa dallim, moshe, gjinie, race, etnie, feje, orientimi seksual apo nevojave të veçanta, dhe jo domosdoshmërisht me sukses të shkëlqyeshëm.
- 1.3. Anëtarë/e me të drejtë vote në nivel klase janë të gjithë nxënësit/et e asaj klase, ndërsa në KN të drejtë vote kanë vetëm nxënësit/et e zgjedhur përfaqësues të klasës së tyre përkatëse.
- 1.4. Nxënësit kanë të drejtë të kërkojnë nga KDSH që të delegojë përfaqësues të cilët monitorojnë zgjedhjet e KN, pa të drejt vote. Përfaqësuesit mund të jenë anëtarë apo jo anëtarë të KDSH.
- 1.5. Kandidatët/et për pozita udhëheqëse në KN, duhet të prezentojnë planin e aktiviteteve para anëtarëve të KN.
- Mandati i anëtarëve të zgjedhur të KN në nivel klase dhe shkolle është njëvjeçar, me mundësi rizgjedhje vetëm edhe për një mandat tjetër.
- 2.1. Mandati i anëtarëve të Këshillit të Nxënësve pushon në rast se anëtarët/et kanë përfunduar shkollimin në shkollën të cilën e përfaqësojnë, ose kanë ofruar dorëheqje.
Neni 8 – Përfaqësimi në KDSH dhe vendimmarrje
- Kryetari/ja i/e KN të shkollës, merr pjesë në takimet e KDSH, si anëtarë me të drejtë vote.
- 1.1. Kryetari/ja i/e KN përfaqëson mendimin dhe të drejtën e të gjithë nxënësve të shkollës në KDSH.
- 1.2. Nëse shkolla ka më shumë se 1000 nxënës, atëherë KN ka të drejtën të përfaqësohet me dy anëtarë me të drejtë vote në takimet e KDSH.
- Përfaqësuesit e nxënësve në KDSH nuk marrin pjesë në takimet e KDSH në raste kur diskutohet për çështje personale të personelit të shkollës, apo çështje tjera të ndjeshme. Sipas kufizimeve të përcaktuara në ligjin për arsimin parauniversitar.
- KN delegon 2 anëtarë në Këshillin e Prindërve.
Neni 9 – Buxheti dhe raportimi
- KN me aprovimin e KDSH kanë të drejtë të organizimit dhe pjesëmarrjes në aktivitete jashtëkurrikulare, aplikimeve për projekte, donacion.
- Buxheti i KN duhet të përdoret vetëm për organizimin e aktiviteteve, duke u bazuar në qëllimin e përcaktuar me këtë Udhëzim administrativ dhe për përmbushjen e planit të punës.
- Përgjegjës për menaxhimin e buxhetit të KN është arkëtari i KN dhe anëtarët tjerë të kryesisë.
- Kryesia e KN në nivel shkolle dërgon një raport financiar (nëse ka pasur qarkullim të të hollave, gjatë vitit) dhe narrativ të aktiviteteve të mbajtura tek KDSH dhe një kopje i dërgohet drejtorisë së shkollës dhe KN.
- Kryesia e KN, informon drejtorin e shkollës, KDSH dhe KN, me shkrim për të gjitha vendimet e marra në lidhje me buxhetin dhe shpenzimet.
Neni 10 – Kërkesat dhe ankesat
- Nxënësit kanë të drejtë të parashtrojnë ankesa, kërkesa dhe reagime në kryesinë e KN në lidhje me ushtrimin e përgjegjësive të KN dhe për çështje tjera.
- 1.1. KN promovon të drejtën e nxënësve për ankesa dhe kërkesa brenda procedurave të rregullta të ankimimit.
- 1.2. Kryesia e KN, duhet të shqyrtojë dhe të kthejë përgjigje tek nxënësit për ankesat, kërkesat dhe reagimet e parashtruara në lidhje me përgjegjësitëe KN, në një afat kohor, më së largu 7 ditë pune.
- 1.3. Ankesa, kërkesat dhe reagimet e nxënësve që adresohet te KN, duhet të regjistrohen si evidencë për raportim tek KDSH.
- Kërkesat, ankesat dhe reagimet e KN të shkollës të cilat dalin jashtë kompetencave të KN, bëhen me shkrim apo me postë elektronike dhe protokollohen nga administrata e shkollës.
- 2.1. Kryesia e KN të shkollës, shqyrton ankesat, kërkesat dhe reagimet e nxënësve të cilat dalin jashtë kompetencave të tyre dhe i adreson ato, tek menaxhmenti i shkollës.
- 2.2. Menaxhmenti i shkollës u përgjigjet kërkesave, ankesave dhe reagimeve të KN me shkrim brenda 7 ditëve të punës.
- KN, ka të drejtë të vazhdojë ankesat në DKA, në rast të pakënaqësisë me reagimin nga menaxhmenti i shkollës.
Neni 11 – Hyrja në fuqi
Ky Udhëzim administrativ hyn në fuqi 7 (shtatë) ditë pas nënshkrimit të tij nga Ministri.
Arbërie Nagavci
Ministre
Datë: 01.06.2021
Loading...
Reload document 
Open in new tab 