Sindikata e Bashkuar e Arsimit, Shkencës dhe Kulturës (SBASHK) ka dërguar zyrtarisht ftesë për takim Ministres së Arsimit, Arbërie Nagavci, me qëllim të diskutimit të shqetësimeve, sfidave dhe kërkesave të tyre në fushën e arsimit. Në një njoftim për mediat, SBASHK bën të ditur se përmes disa shkresave zyrtare kanë kërkuar vazhdimisht një takim me Ministren, por deri më tani nuk kanë marrë asnjë përgjigje.
“Sindikata ka dërguar disa herë kërkesa për takim, për të diskutuar shqetësimet legjitime dhe sfidat që preokupojnë anëtarësinë tonë. Përkundër këtyre përpjekjeve, ju, zonja Ministre, keni zgjedhur të vazhdoni me qasje të gabuar ndaj dialogut të hapur. Justifikimi i vazhdueshëm për angazhimet tuaja brenda dhe jashtë vendit, nuk e arsyeton refuzimin dyvjeçar për të takuar përfaqësuesit e SBASHK-ut,” thuhet në letrën që sindikata i ka adresuar Ministres Nagavci.
Në këtë letër, sindikata paralajmëron se nëse nuk ka një ndryshim në qëndrimin e Ministrisë dhe të Qeverisë, mësimdhënësit janë të gatshëm të ndërmarrin veprime sindikale, duke përfshirë edhe grevën e përgjithshme. “Punëtorët e arsimit, përmes nënshkrimeve të tyre, kanë deklaruar se, nëse ju dhe Qeveria vazhdoni t’i shmangeni dialogut, atëherë veprimet sindikale do të jenë të pashmangshme, përfshirë edhe grevën e përgjithshme,” theksohet në letrën e SBASHK-ut.
© Prinderimi.com Të gjitha të drejtat e rezervuara.
