Komuna e Prishtinës, përmes Drejtorisë Komunale të Arsimit, njofton se, pas një seri kërkesash të përsëritura nga drejtorët e shkollës, prindërit dhe komuniteti lokal, është marrë vendimi për rinovimin e objektit shkollor të Shkollës Fillore dhe të Mesme të Ulët “Zenel Hajdini”. Ky vendim u mor pas analizave të thelluara dhe vlerësimeve të kryera nga Drejtoria e Arsimit dhe Drejtoria e Transformimit, të cilat kanë trajtuar me përparësi të lartë këtë çështje.
Pas inspektimeve të shumta dhe takimeve të mbajtura me ekspertë, u konkludua se rinovimi i plotë i shkollës është i nevojshëm për të përmirësuar kushtet infrastrukturore dhe sigurinë e nxënësve dhe stafit. Gjatë kësaj periudhe, për të garantuar vijimin e rregullt të procesit mësimor dhe sigurinë maksimale të nxënësve, është planifikuar një riorganizim i përkohshëm i nxënësve, të cilët do të shpërndahen në dy shkolla të afërta.
Nxënësit e klasave 0-5 do të ndjekin mësimin në shkollën “Asim Vokshi”, ndërsa nxënësit e klasave 6-9 do të transferohen përkohësisht në shkollën “Emin Duraku”. Ky riorganizim do të respektojë orarin e ri të përcaktuar më poshtë:
Orari i mësimit për shkollat e përkohshme:
- Shkolla “Asim Vokshi” (klasat 1-5)
- Ora e parë: 13:45 – 14:30
- Ora e dytë: 14:35 – 15:20
- Pushim i gjatë: 15:20 – 15:35
- Ora e tretë: 15:35 – 16:20
- Ora e katërt: 16:26 – 17:10
- Ora e pestë: 17:15 – 18:00
- Shkolla “Emin Duraku” (klasat 6-9)
- Ora e parë: 13:30 – 14:15
- Ora e dytë: 14:20 – 15:05
- Pushim i gjatë: 15:05 – 15:20
- Ora e tretë: 15:20 – 16:05
- Ora e katërt: 16:10 – 16:55
- Ora e pestë: 17:00 – 17:45
- Ora e gjashtë: 17:50 – 18:35
Ky organizim është projektuar për të siguruar që të mos ketë ndërprerje në procesin mësimor dhe për të garantuar që të gjithë nxënësit të kenë akses të plotë në arsim, pavarësisht rinovimeve të nevojshme.
Njoftimi zyrtar:
Myrvete Tahiri, drejtoresha e shkollës “Zenel Hajdini”, siguroi prindërit dhe komunitetin se ky proces do të menaxhohet me kujdes maksimal dhe me përkushtim të plotë nga institucionet përgjegjëse. Ajo theksoi rëndësinë e bashkëpunimit ndërmjet të gjitha palëve të përfshira, për të garantuar një përvojë sa më të mirë dhe të sigurt për nxënësit gjatë periudhës së rinovimit.
© Prinderimi.com Të gjitha të drejtat e rezervuara.
