Jo çdo nënë e përjeton me gëzim këtë periudhë të vitit. Në fakt, shumë nëna përballen me ndjenja trishtimi dhe ankthi kur fëmijët e tyre rikthehen në shkollë.
Fillimi i shkollës shpesh mund të nxisë reflektime të mëtejshme mbi atë se sa shpejt kalon koha dhe sa shumë ndryshojnë gjërat, tha Jill E. Daino, punonjëse sociale dhe terapiste me bazë në Nju Jork, për ABC News. Koha është një nga shumë gjërat mbi të cilat nuk kemi kontroll, ndaj, pavarësisht nëse dikush është gati apo jo, fillimi i vitit shkollor ka ardhur. Për disa nëna, identiteti i të cilave është formësuar thellësisht nga të qenit nënë, fillimi i një viti të ri shkollor shënon një tjetër hap të fëmijës drejt pavarësisë.
Mia Carella, nënë dhe autore e faqes ThisMomWithaBlog.com, ndau në Facebook vështirësitë që po përjetonte gjatë ditëve të para të vajzës së saj në klasën e parë. Thanë se do të bëhej më e lehtë. Thanë se viti i kaluar do të ishte më i vështiri, sepse ishte hera e parë, shkroi ajo. Thanë se këtë vit do të ishte më mirë; se do të isha e lumtur ta shihja të kthehej në shkollë pas një vere të gjatë. Jo.
Ajo i tha ABC News: Rrjetet sociale janë plot me postime nga prindër që mezi presin t’i shohin fëmijët e tyre të kthehen në shkollë, por e di që nuk jam vetëm në mënyrën se si ndihem. Mendoj se është krejtësisht normale të mos hidheni nga gëzimi në stacionin e autobusit. Nëse ndiheni të tillë, shumë mirë. Por nëse jeni si unë, edhe kjo është në rregull. Doja ta shprehja këtë në postimin tim dhe t’u tregoja prindërve të tjerë se ndjenjat e tyre janë normale.
Ankthi i ndarjes
Shumica e klientëve të mi janë nëna dhe shumë prej tyre përjetojnë trishtim dhe ankth ndërsa fëmijët e tyre rriten, tha Limor Weinstein, këshilluese e shëndetit mendor dhe trajnere për prindër, për ABC News. “Shumë nëna janë të lidhura ngushtë me fëmijët e tyre dhe e kanë të vështirë të ndahen prej tyre. Ankthi i ndarjes, të cilin e përjetojnë kaq shumë fëmijë kur largohen nga prindërit, ndonjëherë është po aq i pranishëm edhe te nënat. Kjo është e natyrshme.”
Të lejosh zemrën tënde – gjithë botën tënde – të dalë në botë vetëm, pa ty, nuk është kurrë e lehtë, shkroi Carella në postimin e saj. “Duhet të besojmë se bota do t’i trajtojë ashtu siç do t’i trajtonim ne. Të besojmë se do të kenë gjithçka që u nevojitet. Të besojmë se mund ta zbusim kapjen tonë të fortë, përmes së cilës mendojmë se po mbajmë gjithçka nën kontroll, dhe t’i lëmë të shkojnë.”
Weinstein tha se ankthi mund të shfaqet më shumë në këtë periudhë të vitit.
Ankthi mund të shfaqet edhe përmes frikës për fëmijën, frikës se mund t’i ndodhë diçka e keqe dhe se ju nuk do të jeni aty për ta mbrojtur, tha ajo. Edhe faktorë të tjerë, në dukje të palidhur, mund të kontribuojnë në këtë ankth dhe trishtim. Nëse përgjithësisht ndiheni sikur po humbisni kontrollin në fusha të tjera të jetës suaj, rikthimi i fëmijëve në shkollë mund ta përforcojë këtë ndjenjë.
Ajo shtoi se një terapist që përdor terapi njohëse-sjellore (CBT) dhe qasje të psikologjisë pozitive mund të jetë i dobishëm për nënat.
Mbështetja nga të tjerët ndihmon shumë
Daino theksoi gjithashtu rëndësinë e mbështetjes nga miqtë dhe familjarët. Shpesh gratë mund të ndihen vetëm me këto ndjenja, nëse mendojnë se janë të vetmet që po përjetojnë diçka të tillë. Prandaj, është e rëndësishme të kenë në jetën e tyre një person mbështetës dhe jo gjykues. Në të njëjtën kohë, si terapiste, do të doja t’i ndihmoja të kuptonin se nga burojnë konkretisht këto ndjenja, sepse ato kanë aspekte të veçanta për çdo individ.
Sa i përket Carella-s, vajza e së cilës e kishte nisur shkollën disa javë më parë, ajo tha se vajza ishte e lumtur në shkollë dhe se çdo ditë bëhej pak më e lehtë. Megjithatë, ajo dëshiron që prindërit e tjerë të dinë se i kupton shumë mirë ndjenjat e tyre.
Lërini të rriten, shkroi ajo në postimin e saj në Facebook. Por është e vështirë – një nga gjërat më të vështira që kam bërë ndonjëherë. Për të gjitha nënat dhe baballarët që këtë vit po e kanë të vështirë të lëshojnë, nuk jeni vetëm. Aspak vetëm.
Artikull nga: Genevieve Shaw Brown
Përkthim: Prinderimi.com
