Çdo prind e rrit fëmijën ndryshe dhe çdo familje ka vlerat dhe qasjet e veta ndaj punëve të shtëpisë, vakteve familjare dhe gjithçkaje tjetër që përbën jetën e përditshme. Por, nëse ka një gjë që pothuajse çdo prind e ka të përbashkët, është kjo: të gjithë kemi kaluar net pa gjumë—ndonjëherë edhe disa net radhazi—për shkak të një bebeje që nuk pushonte së qari.
Por prindërit me përvojë e dinë se netët pa gjumë nuk përfundojnë sapo kalon periudha e të porsalindurit, veçanërisht për nënat.
BetterSleep, një aplikacion që monitoron zakonet e gjumit të përdoruesve, publikoi së fundmi raportin e tij “Bedtime Report”, dhe nga të dhënat është e qartë se nënat kanë nevojë për përmirësime në mënyrën se si kujdesen për gjumin e tyre.
Pse nënat nuk po flenë mirë?
Aplikacioni bashkëpunoi me kompaninë Wakefield Research për të anketuar 1,000 nëna në të gjithë vendin, të cilat kanë fëmijë nën moshën 18 vjeç që jetojnë në shtëpi. Sipas të dhënave të mbledhura, 29% e nënave nuk kanë bërë një gjumë të mirë gjatë javës së fundit—dhe, sinqerisht, shumë nëna mund ta kuptojnë këtë—ndërsa vetëm 23% thonë se “flenë të paktën shtatë orë gjatë një nate të zakonshme të javës”. Dhe ky është minimumi absolut.
Nënat që nuk kanë partner që jeton në të njëjtën shtëpi po flenë, kuptueshëm, edhe më pak—33% e tyre raportuan se po funksionojnë me pesë orë gjumë ose më pak. Dhe në fakt, nuk janë domosdoshmërisht fëmijët ata që po i mbajnë zgjuar! Shtatëdhjetë për qind e nënave përmendën “ankthin, ngarkesën mendore ose mendimet që nuk ndalen” si arsye për netët pa gjumë, ndërsa 20% të tjera fajësuan gërhitjen e partnerit.
Interesant është fakti se shumica e nënave nuk qëndrojnë thjesht në shtrat, në errësirë, duke u përpjekur të flenë. 68% e tyre deklaruan se, në fakt, qëndrojnë zgjuar më vonë me qëllim. Nëse je nënë, ndoshta e kupton fare mirë. Ka pafund net kur kam qëndruar zgjuar më gjatë nga ç’duhej vetëm për t’u siguruar që rrobat ishin palosur, enët ishin larë dhe, nëse do të kisha fat, të arrija të bëja edhe një dush para gjumit. Ky fenomen ka edhe një emër: shtyrja e qëllimshme e orarit të gjumit si “hakmarrje” (revenge bedtime procrastination).
Si e vështirëson lodhja prindërimin?
Por, qartësisht, kjo mënyrë jetese nuk është e qëndrueshme. Një prind i rraskapitur ka më pak durim, irritohet më lehtë, e ka të vështirë të përqendrohet, harron detaje të rëndësishme dhe madje nuk arrin ta shijojë kohën me fëmijët e tij, sepse është tepër i lodhur.
Rezultatet e raportit e theksojnë këtë problem: 48% e të anketuarave ndihen sikur thjesht “po i kryejnë gjërat mekanikisht” në marrëdhënien me fëmijët e tyre, ndërsa 34% po mbështeten gjithnjë e më shumë te ekranet ose televizori për t’ia dalë gjatë ditës. Dhe ja një statistikë vërtet shqetësuese: 20% e nënave thanë se “ndihen emocionalisht të shkëputura nga fëmijët e tyre”.
Nënat që vuajnë nga mungesa e gjumit nuk janë prindër të dështuar dhe as të pandjeshëm. Ato thjesht po përballen me shumë pritshmëri njëherësh. Ato janë këshilluese të shëndetit mendor, kuzhiniere, mjeke, organizatore festash dhe menaxhere të jetës së familjes—dhe kjo është shumë për t’ia ngarkuar një personi të vetëm.
Kjo po ndikon edhe në mënyrën se si nënat performojnë në punë. 53% e nënave që punojnë thanë se “kanë marrë pushim mjekësor, janë larguar më herët nga puna ose kanë pasur performancë më të dobët gjatë vitit të kaluar për shkak se nuk kishin fjetur”.
Nënat e lodhura janë gjithashtu ato që po kujdesen më pak për veten, duke e përkeqësuar edhe më shumë ndjenjën e lodhjes dhe rraskapitjes emocionale (Burnout) 49% e nënave nuk ushtrohen aq sa do të dëshironin; 46% kanë reduktuar kohën që u kushtojnë hobive të tyre; ndërsa 45% kalojnë më pak kohë me miqtë. Me fjalë të tjera, aktivitetet që i bëjnë të ndihen të qëndrueshme, të pavarura dhe vetvetja janë ato që sakrifikohen të parat.
Terapia për shëndetin mendor, më shumë ndihmë nga partneri ose familja e gjerë, si dhe një vend pune më mirëkuptues ose një orar më fleksibël, mund të ndihmojnë shumë në uljen e presionit mbi nënat, në mënyrë që ato të marrin pushimin aq të nevojshëm.
Nuk është në rregull që 36% e nënave thanë se mendojnë se pushimi është diçka që duhet ta meritojnë. Kjo mënyrë të menduari i nxit njerëzit të punojnë deri në rraskapitje për familjen e tyre. Sigurisht, familja e vlerëson përkushtimin, por edhe ti duhet të kujdesesh për veten—të paktën në mënyrë që të jesh aty për ta edhe në afat të gjatë.
Mos harro, mami: Koha jote ka rëndësi. Shëndeti yt ka rëndësi. Pusho.
Artikull nga: Elisabeth Sherman
Përkthim: Prinderimi.com
