Gjuha nuk është vetëm mënyra se si komunikojmë. Ajo mbart kujtesën, historinë, letërsinë dhe kulturën e një populli. Për këtë arsye, njohja dhe studimi i gjuhës shqipe janë një pjesë e rëndësishme e edukimit dhe e ruajtjes së trashëgimisë kulturore.
Nga 7 deri më 27 gusht 2026, hapësirat e Fakultetit Filologjikt të Universitetit të Prishtinës ”Hasan Prishtina”në Prishtinë zhvillohet ”Seminari XLIV Ndërkombëtar për Gjuhën, Letërsinë dhe Kulturën Shqiptare”, një prej ngjarjeve më të rëndësishme akademike kushtuar albanologjisë. Programi përfshin kurse gjuhe, ligjërata, referime, tryeza diskutimi, sesione shkencore, aktivitete kulturore dhe vizita studimore.
Një hapësirë ku takohet dija
Seminari mbledh studiues, profesorë, studentë dhe albanologë nga Kosova, Shqipëria dhe vende të ndryshme të botës. Për të rinjtë, kjo krijon një mundësi të veçantë për të parë se si gjuha, letërsia dhe kultura mund të studiohen nga këndvështrime shumë të ndryshme.
Programi i sivjetshëm është veçanërisht i larmishëm. Në mesin e temave janë gjuha shqipe dhe perspektivat e saj indo-evropiane e ballkanike, dialektet, kontaktet gjuhësore, letërsia shqipe, kujtesa kulturore, identiteti, trashëgimia, migrimi dhe ndikimi i epokës digjitale në gjuhë e komunikim.
Një pjesë e veçantë i kushtohet edhe studiuesve të rinj. Sesioni i letërsisë përfshin tema mbi krizën e leximit, atdheun në poezinë shqiptare, kujtesën, identitetin kombëtar dhe marrëdhënien mes letërsisë dhe lexuesit.
Çfarë mund të fitojnë të rinjtë?
Pjesëmarrja në një aktivitet të tillë nuk është vetëm një mundësi për të dëgjuar ligjërata. Studentët mund të takojnë studiues, të njihen me fusha të reja kërkimi, të bëjnë pyetje dhe të kuptojnë se pas çdo gjuhe, libri apo dokumenti historik fshihen pyetje që kërkojnë hulumtim.
Edhe fëmijët dhe adoleshentët mund të përfitojnë nga kjo frymë e kërkimit. Prindërit mund t’i nxisin ata të lexojnë letërsinë shqipe, të vizitojnë biblioteka e muze, të interesohen për historinë e gjuhës dhe të mos e shohin shqipen vetëm si një lëndë shkollore.
Në një kohë kur komunikimi digjital po ndryshon mënyrën se si shkruajmë dhe flasim, ruajtja e një marrëdhënieje të pasur me gjuhën bëhet edhe më e rëndësishme. Programi i Seminarit përfshin pikërisht edhe diskutime mbi shqipen në epokën digjitale, duke treguar se tradita dhe zhvillimet e reja mund të studiohen së bashku.
Një ftesë për të mësuar
Seminari është, në thelb, një festë e dijes, por edhe një kujtesë për rëndësinë e kulturës që u përcillet brezave. Prindërit mund t’ua përcjellin fëmijëve këtë interes jo vetëm përmes librave, por edhe duke i mësuar të bëjnë pyetje, të dëgjojnë, të lexojnë dhe të kërkojnë përgjigje. Përmes këtij seminari hulumtuesit, Profesorët dhe studentët mund t’i përcjellin studimet e reja në gjuhë dhe në letërsi shqipe, të përfitojnë përvoja ndërkombëtarizimi me studjuesit nga jashtë, dhe ta shohin gjuhën shqipe në një perspektivë shumëdimensionale, kulturore dhe sociale.
Programin e plotë, me sesionet, ligjëratat dhe përmbajtjen e punimeve, mund ta gjeni këtu:
Programi i Seminarit XLIV Ndërkombëtar për Gjuhën, Letërsinë dhe Kulturën Shqiptare
Prinderimi.com
