Vera është stina e preferuar për shumë njerëz, por disa mite rreth alergjive gjatë kësaj periudhe mund të zbehin përjetimin e saj. Le të përmendim disa prej tyre:
1.Alergjitë në ambientin e jashtëm ndodhin vetëm në pranverë dhe në vjeshtë. Është e gabuar të mendoni se alergjitë sezonale përfundojnë me pranverën. Polenet vazhdojnë të jenë të pranishme në ajër edhe në fillim të verës, duke shkaktuar simptoma si teshtitje, kruarje të hundës, lotim dhe kruajtje të syve. Gjithashtu, sporet e mykut janë të zakonshme gjatë verës, veçanërisht në zonat me lagështi të lartë, dhe mund të shkaktojnë reaksione alergjike serioze deri në simptoma të astmës. Për të menaxhuar këto alergji, mjekime si antihistaminikët dhe spray-t intranasalë mund të jenë ndihmë. Nëse simptomat vazhdojnë dhe jeni të lodhur nga përdorimi i barnave, imunoterapia (vaksinat kundër alergjisë) mund të jetë një opsion për ju.
2.Jam alergjik ndaj klorit, prandaj nuk mund të notoj. Klori është një dezinfektues i zakonshëm që përdoret në pishina për t’i bërë ato të sigurta. Edhe pse klori mund të irritojë dhe të përkeqësojë simptomat ekzistuese të alergjive, nuk është një alergen në vetvete si ushqimet, polenet apo pickimet e insekteve. Megjithatë, ai mund të shkaktojë skuqje të lëkurës, kollë, dhe acarim të syve dhe hundës.
3.Jam alergjik ndaj mushkonjave, prandaj duhet të qëndroj brenda dhe të vesh rroba me mënga të gjata. Ndërsa mushkonjat janë të bezdisshme gjatë verës, ato rrallëherë shkaktojnë reaksione alergjike të ngjashme me ato nga bletët. Mushkonjat mund të transmetojnë sëmundje si virusi Zika dhe encefaliti i West Nilit, por nuk shkaktojnë simptoma të rëndësishme alergjike. Nëse ju pickon një mushkonjë, përdorni një antihistaminik dhe aplikoni një krem hidrokortizoni për të qetësuar kruarjen.
4.Sa herë që shoh diellin, teshtij. Duhet të jem alergjik ndaj dritës së diellit. Nëse teshtini çdo herë që dilni në dritën e diellit, ndoshta keni një refleks të shtuar të teshtitjes, por nuk jeni alergjik ndaj dritës. Kjo ndodh për shkak të një ndryshimi të papritur në intensitetin e dritës, i cili stimulon nervat e syve dhe shkakton teshtitje. Kjo gjendje është mjaft e zakonshme dhe prek deri në 35% të popullsisë, duke u trashëguar shpesh në familje. Nuk është e rrezikshme dhe nuk ka nevojë për trajtim.
5.Disa fruta dhe perime të freskëta më shkaktojnë irritim në gojë dhe kruarje. Duhet të kem një alergji ushqimore shumë të rrezikshme. Nëse përjetoni kruarje në gojë ose gërvishtje në fyt pas ngrënies së disa frutave ose perimeve të papërpunuara, mund të vuani nga Sindroma e Alergjisë Oral-Polen-Ushqim. Kjo sindromë shkaktohet nga reaksioni i kryqëzuar mes poleneve dhe proteinave të ngjashme në disa fruta dhe perime. Simptomat përfshijnë kruarje në gojë, gërvishtje në fyt, ose ënjtje të buzëve, mukozës së gojës, ose gjuhës. Këto simptoma zakonisht largohen shpejt pasi ushqimi gëlltitet dhe nuk kërkohet trajtim. Gjithashtu, kur këto ushqime gatuhen, simptomat shpesh zhduken për shkak të ndryshimit të strukturës së proteinave.
