Ekonomistët llogaritën kostot dhe përfitimet e detyrave të shtëpisë dhe aktiviteteve jashtëshkollore. Gjetjet tregojnë kosto shqetësuese për shëndetin mendor.
Psikologët kanë paralajmëruar prej kohësh se jeta e fëmijëve po mbingarkohet me aktivitete, gjë që mund të kufizojë mundësinë e tyre për të zhvilluar aftësi joakademike, të cilat do t’u nevojiten në moshë madhore, nga përballimi i dështimeve deri te ndërtimi i marrëdhënieve të shëndetshme. Tani, një grup prej tre ekonomistësh thotë se ka arritur të llogarisë disa prej këtyre kostove psikologjike.
Në një analizë të të dhënave, të publikuar në numrin e shkurtit 2024 të Economics of Education Review, tre ekonomistë nga Universiteti i Xhorxhias dhe Bordi i Rezervës Federale zbuluan se nxënësve u jepen aq shumë detyra shtëpie dhe përfshihen në aq shumë aktivitete jashtëshkollore, saqë “ora e fundit” nuk po kontribuonte më në zhvillimin e aftësive akademike. Përkundrazi, aktivitetet po ndikonin negativisht në mirëqenien mendore të nxënësve, duke i bërë ata më të shqetësuar, të dëshpëruar ose të zemëruar.
Njëra prej autoreve të studimit, Carolina Caetano, theksoi se problemi nuk qëndron domosdoshmërisht te secili aktivitet veçmas, por te sasia e përgjithshme e aktiviteteve. Detyrat e shtëpisë dhe aktivitetet e planifikuara po marrin kohën që fëmijëve u nevojitet për gjumë dhe shoqërim me të tjerët.
Pasojat negative ishin veçanërisht të dukshme gjatë viteve të shkollës së mesme, kur nxënësit përballen me presionin për nota të larta dhe përfshirje në aktivitete jashtëshkollore, shpesh edhe për aplikimet në universitete.
Studiuesit analizuan ditarët e përdorimit të kohës të 4,300 fëmijëve dhe adoleshentëve, nga kopshti deri në klasën e 12-të. Të dhënat ishin mbledhur gjatë viteve, duke filluar nga viti 1997, si pjesë e Panel Study of Income Dynamics, një studim i madh dhe përfaqësues i familjeve në SHBA.
Aktivitetet që synonin zhvillimin e aftësive të fëmijëve u përkufizuan si “pasurim”. Detyrat e shtëpisë përbënin rreth dy të tretat e kësaj kohe, ndërsa leximi zinte 14% dhe programet para dhe pas shkollës 7%. Mesatarisht, fëmijët shpenzonin 45 minuta në ditë në të gjitha këto aktivitete, megjithëse koha varionte nga zero deri në katër orë.
Në fillim, të dhënat tregonin se fëmijët me më shumë aktivitete të planifikuara kishin rezultate më të mira akademike dhe sjellje më pozitive. Por studiuesit vunë re se këta fëmijë shpesh vinin nga familje me më shumë burime financiare, të cilat mund të përballonin tutorë, aktivitete pas shkollës ose kujdes shtesë për fëmijët.
Pasi studiuesit morën parasysh dallimet mes fëmijëve, përfitimet akademike të orëve shtesë u zhdukën, ndërsa ndikimi në mirëqenien psikologjike u bë negativ. Pra, ora shtesë e detyrave ose aktiviteteve nuk sillte më përmirësim në rezultatet e testeve, por mund të dëmtonte mirëqenien e fëmijës.
Studimi ngre një pyetje të rëndësishme për prindërit: A ka fëmija mjaftueshëm kohë për të fjetur, luajtur lirshëm, shoqëruar me të tjerët dhe thjesht për të mos pasur asgjë të planifikuar?
Studiuesit theksojnë se nevojiten më shumë kërkime për të kuptuar se cilat aktivitete mund të jenë më të dëmshme dhe në çfarë moshe. Ndërkohë, mesazhi nuk është se detyrat e shtëpisë apo aktivitetet jashtëshkollore janë të këqija. Çështja është ekuilibri.
Prindërit dhe shkollat përballen me presione të shumta, ndaj ndryshimi nuk është gjithmonë i lehtë. Por studimi rikthen një pyetje themelore: Kur përpjekja për ta përgatitur fëmijën për sukses fillon t’i marrë atij kohën që i nevojitet për të qenë mirë?
Autor:Jill Barshay
Përkthim: Prinderimi.com
