Motivimi i ulët për mësim
Ka qenë një kohë ndoshta para njëqind vitesh, kur lidhja midis arsimimit dhe fitimit të jetesës nuk ishte aq e qartë, për shkak të përhapjes së analfabetizmit dhe diturisë së pakët në profesionet e ndryshme. Mirëpo, kjo kohë ka mbaruar. Sot kriteri kryesor i avancimit të individëve, familjeve dhe kombeve është sasia e diturisë, përvojës dhe shkathtësive që i posedojnë dhe përdorin.
Për rrjedhim, kur fëmija nuk ka një motiv të fortë për të studiuar paraqitet një problem i madh për familjen. Dëshiroj të them me plotë bindje se braktisja e shkollimit nga fëmija pas klasës së pestë ose më vonë do t’i bëj më tepër dëm një familje sesa prerja e dorës së fëmijës ose humbja e të dëgjuarit në njërin vesh. Duke parë seriozitetin e kësaj i këshilloj prindërit t’i kushtojnë rëndësi shumë të madhe performancës së shquar të fëmijëve të tyre në shkollë dhe prej fëmijëve të tyre të mos pranojnë më pak se mbarimin e një fakulteti. Gjithashtu i nxis të jenë liberalë në shpenzimin për t’i regjistruar fëmijët në shkollën më të mirë të mundshme.
Për më tepër mendoj se motivimi i fëmijëve për performacë të shquar në shkollë dhe për vazhdimin e studimeve të tyre është rezultat i përpjekjes së familjes, e cila prioritet të parë e ka të ardhmen e fëmijëve të saj.
“Fëmijët të cilët nuk kanë vullnet të jenë të suksesshëm në shkollim janë viktimë e dështimit të shtëpisë në të cilin kanë marrë kujdesin, mjedisit të mangët dhe të keq ku janë rritur dhe shkollave të dobëta dhe të pakujdesshme në të cilat janë shkolluar.”
Çka është motivi i ulët për mësim?
Njerëzit shpesh duket se i ngatërrojnë dëshirat dhe motivet, shpesh njërën e zëvendësojnë me tjetrën. Mirëpo, natyrisht se ato nuk janë e njëjta gjë. Të gjithë njerëzit, të rinjtë ose të vjetrit kanë dëshirë për të arritur sukses, për të shkëlqyer dhe për t’u shquar në shoqëri, mirëpo dëshirat e tilla mund të mbeten më tepër si ëndrra dhe shpresa. Ato do të mbeten iluzion nëse nuk shndërrohen në shtytje aktive që stimulon veprim. Shtytja është potenciali i fëmijës drejt një sjellje të caktuar. Fëmija ka nevojë për një shtytje, një motiv që e detyron të punojë dhe të përpiqet për arritje të lartë akademike, një shtytje e tillë do t’i japë qëndrueshmëri përpjekjes së tyre.
Të gjithë kemi para fëmijë të cilët kanë një entuziazëm të admirueshëm për të arritur më të mirën në katër vitet e para të shkollës fillore, pastaj në vitin e pestë e tutje ka rënie në ambiciet e tyre. Notat e tyre në lëndë të ndryshme janë më të vogla secilën herë. Ajo që mund t’i ketë sjellë në këtë gjendje është humbja e energjisë, potencialit që e ka ushqyer përpjekjen e tyre drejt të mësuarit të mirë dhe të frytshëm.
Përgatiti: Prinderimi.com
Autor: Prof. Dr. Abdul Kerim Bekkar, “Problemet e fëmijëve”
