Imagjinoni një verë më të ngadaltë dhe më të qetë
Imagjinoni një verë ku, në vend që të vraponi nga kampet verore te aktivitetet sportive apo udhëtimet e shumta, ju dhe familja juaj i kushtoni rëndësi kënaqësive të thjeshta – si darkat familjare, lojërat në oborr, leximi i librave. Kjo është thelbi i “verës së ngadaltë” (slow summer).
Një verë e ngadaltë nënkupton një ritëm më të qetë, me më pak aktivitete të planifikuara dhe më pak shpërqendrime digjitale. Synimi është ta shijoni verën, jo thjesht ta kaloni atë, duke kujtuar se marrëdhënia me fëmijët nuk matet me numrin e aktiviteteve apo udhëtimeve.
Terapistja familjare Audrey Schoen (LMFT) thotë se prindërit duhet t’u dhurojnë fëmijëve atë verën e qetë të viteve ’90, të cilën shumë e kujtojnë me nostalgji. Është shumë më pak stresuese. Fëmijët do të mbajnë mend mënyrën se si ndiheshin pranë jush, më shumë sesa aktivitetet që bëtë ose sa luksoze ishin pushimet. Nëse jeni të mbingarkuar, të stresuar dhe nervozë duke u përpjekur të krijoni kujtime, atëherë po përqendroheni te kujtimet e gabuara.
Sipas saj, kur prindërit ngadalësojnë ritmin dhe janë të pranishëm në moment, marrëdhëniet bëhen prioritet.
Ka kohë dhe hapësirë për të bashkëvepruar pa një axhendë apo orar. Kjo largon presionin e paketimit, udhëtimeve, dhe pritshmërive për të krijuar përvoja perfekte.
Planifikoni kohë… për të mos bërë asgjë
Schoen rekomandon që familjet të planifikojnë kohë të lirë në kalendar.
Kohë në shtëpi, në parkun e lagjes ose në pishinën e komunitetit. Blini një rrëshqitëse me ujë ose një pishinë të vogël për fëmijë. Organizoni beteja me pistoleta uji. Bëjeni darkën një ritual të përditshëm ku merr pjesë e gjithë familja. Ndizni skarën në oborr ndërsa fëmijët luajnë. Organizoni një piknik pranë një liqeni me familjarë, pa shumë planifikime – vetëm me ushqim të mirë dhe njerëz të afërt.
Ajo këshillon gjithashtu kufizimin e kohës para ekraneve, jo vetëm për fëmijët, por edhe për të rriturit.
Mund të vendosni orare për përdorimin e pajisjeve elektronike, por pjesën tjetër të kohës lërini telefonat mënjanë. Lejojeni veten të mërziteni. Pikërisht mërzia është vendi ku lind kreativiteti dhe prania e plotë. Gjithashtu, ajo sugjeron që udhëtimet e mëdha të kufizohen vetëm në disa raste gjatë verës.
Një verë në natyrë
Marianne Fransius, drejtoreshë ekzekutive e Bébé Voyage, tregon se pas një udhëtimi shumë intensiv në Argjentinë, Brazil dhe Bolivi gjatë dimrit, familja e saj ka vendosur ta kalojë këtë verë krejt ndryshe. Pasi të transferohen në Belgjikë në muajin gusht, ata do të kalojnë më shumë se një muaj në shtëpinë e tyre të fshatit.
Ditë të qeta dhe më pak angazhime
Chad McAuliff, këshilltar financiar dhe baba i shtatë fëmijëve, thotë se familja e tij e pëlqen një verë fleksibile.
Na pëlqen që kalendari të mos kontrollojë ditët tona.Aktivitetet e tyre përfshijnë notin, lojërat në rërë, biçikletat, patinat, lëkundëset në pemë, kopshtarinë dhe lojërat me ujë. Shumica zhvillohen në shtëpi. Për të, një verë e ngadaltë do të thotë më pak shpenzime dhe më shumë kohë së bashku.
“Një verë e tillë nënkupton edhe të thuash ‘jo’ ndaj shumë ftesave. Mund të kalojmë një javë pa asnjë aktivitet të planifikuar, të shkojmë disa ditë pranë ujëvarave, të organizojmë një lojë, ose secili të zgjedhë një libër dhe ta lexojë në oborr.”
Të udhëtosh me vetëdije
Monica Virga Alborno, inxhiniere dhe themeluese e Wanderwild Family Retreats, do ta kalojë verën mes New Jersey-t, New York-ut dhe Norvegjisë, por me një qasje më të ndërgjegjshme.”Për ta bërë këtë, duhet të mësoj t’u them jo ftesave që na mbingarkojnë dhe t’i lë planeve tona hapësirë për spontanitet.”
Familja e saj synon të rikthehet tek gjërat bazë: shëtitje pranë liqeneve, ecje në natyrë dhe mbrëmje nën yje duke kampuar në oborr.Ajo beson se një kalendar më pak i mbushur krijon hapësirë për biseda kuptimplota, kuriozitet dhe vëzhgim.”Kur fëmijët e mi të rriten dhe të zgjedhin të kalojnë kohë me mua për shkak të lidhjes sonë, atëherë do ta konsideroj të arritur qëllimin tim si prind.”
Një verë pa rrjete sociale
Brittany Lewis, profesioniste e marrëdhënieve me publikun dhe nënë e dy fëmijëve të vegjël, ka vendosur që kjo verë të jetë pa rrjete sociale. Ajo planifikon të lërë disa fundjava krejtësisht të lira.
Fundjavat e verës mbushen shumë shpejt dhe pastaj vera kalon pa e kuptuar. Prandaj dua të kemi ditë të qeta për shëtitje, kopshtari ose lexim.Ajo gjithashtu do të fshijë përkohësisht rrjetet sociale dhe do të përdorë një aparat fotografik dixhital. “Më pëlqen të fotografoj momentet e bukura, por telefoni më shpërqendron. Dua ta lë në çantë dhe të jem plotësisht e pranishme.”
Çdo mëngjes do të përgatisë ushqime të thjeshta për piknik, në mënyrë që familja të mos detyrohet të kthehet në shtëpi për të gatuar nëse po kalojnë bukur kohën,Po ashtu, ajo nuk do ta regjistrojë djalin e saj trevjeçar në aktivitete të organizuara.
Ajo që më pëlqen te fëmijët e vegjël është se na mësojnë të ngadalësojmë ritmin – të vërejmë lulet që çelin, ngjyrën e qiellit dhe gjërat e vogla. Mendoj se të gjithëve na bën mirë të mos nxitojmë dhe të luajmë pa ndërprerje, në vend që të vrapojmë nga një aktivitet te tjetri.
Artikull nga: Hannah Nwoko
Përkthim: Prinderimi.com
