Fëmijët mësojnë të jenë të mirë dhe të kujdesen për të tjerët duke parë sjelljen e të rriturve rreth tyre. Të mësuarit për të ndarë mirësinë fillon me zhvillimin e empatisë – aftësia për t’u lidhur me atë që mund të mendojnë ose ndjejnë të tjerët.
Si prind ose kujdestar, ju mund të ndihmoni në kultivimin e mirësisë dhe empatisë tek fëmijët tuaj përmes bisedave, tregimeve dhe aktiviteteve të përditshme që ndani në shtëpi dhe në lagjen tuaj.
Më poshtë janë disa këshilla dhe ide për të nxitur mirësinë dhe zhvillimin social-emocional:
Si po ndiheni sot?
Çdo ditë, ndani kohë për të biseduar me njëri-tjetrin rreth ndjenjave tuaja dhe ndihmoni fëmijën tuaj të përdorë fjalë për të shprehur emocionet e tij, si: i emocionuar, i shqetësuar, i trishtuar, i zhgënjyer ose i lumtur. Biseda të tilla ndihmojnë në zhvillimin e empatisë dhe mirësisë.
Lexoni libra për mirësinë
Leximi i librave që flasin për mirësinë është një mënyrë e shkëlqyer për të kaluar momente të veçanta dhe për të mësuar rreth rëndësisë së të qenit i mirë. Ndërsa lexoni, bisedoni me fëmijën për mënyrën se si personazhet tregojnë mirësi dhe kujdes për njëri-tjetrin.
Shkruani një shënim mirësie
Tregoni mirësi duke shkruar një shënim për të shprehur mirënjohjen tuaj dhe për t’i ndriçuar ditën dikujt. Dekoroni shënimin me vizatime dhe dorëzojeni atë me kujdes ose dërgojeni me postë.
Praktikoni vetëdijen e plotë (mindfulness)
Vetëdija është një mënyrë e shkëlqyer për të treguar mirësi ndaj vetes duke u përqendruar në mendimet dhe ndjenjat tuaja në momentin e tanishëm. Si familje, provoni të merrni frymë thellë, të dëgjoni muzikë relaksuese ose të vizatoni së bashku.
Telefononi një të dashur
Telefononi ose bëni një video-thirrje me një anëtar të familjes ose mik për të ndarë fjalë të mira përse i doni dhe i vlerësoni ata.
Shkruani një poezi për mirësinë
Shprehni se çfarë do të thotë mirësia për familjen tuaj duke shkruar një poezi rreth saj. Përfshini fjalë të mira për njëri-tjetrin dhe ndani ato me të tjerët. Mund t’i shtoni një ritëm dhe ta shndërroni në këngë.
Ndani tregime mirësie
Çdo ditë ndani si familje momente ku treguat mirësi ose dikush tregoi mirësi ndaj jush. Diskutoni se si ju bëri të ndiheni dhe si mendoni që mirësia juaj ndikoi tek të tjerët.
Shkarkoni Toolkit-in origjinal:
Loading...
Reload document 
Open in new tab Burimi: Talking is Teaching.
Solli në shqip: Prinderimi.com
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
