Studentët që duan të kontrollojnë atë çfarë kanë lexuar, e dinë që testet janë pjesë e jetës akademike. Provimet janë mënyra kryesore me të cilën profesorët vlerësojnë se sa është përvetësuar lënda. Profesorë të ndryshëm kryejnë testime një ose dy herë brenda javës ose disa javëve. Strategjitë e përshkruara në këtë kapitull, do t’ju ndihmojnë t’i kryeni me sukses testimet. Duhet të bëni të gjitha përpjekjet për t’i thelluar njohuritë dhe sipas mënyrës suaj t’i shkruani ato që dini në blloqe shënimesh në mënyrë që t’i përdorni sa herë ju duhen. Ka edhe disa gjëra të tjera që duhen bërë gjatë përgatitjes për testin. Më poshtë do të shohim disa nga këto strategji. Disa prej tyre duhet të kryhen disa javë përpara testimit. Disa të tjera pak para testimit dhe disa të tjera gjatë testimit.
DISA JAVE PARA PROVIMIT:
1. Përsëritni në mënyrë të vazhdueshme. Kjo nënkupton përsëritjen e shënimeve rregullisht gjatë gjithë semestrit. Mos filloni studimin vetëm pak kohë para provimit.
2. Gjeni një shok dhe studioni së bashku. Kjo do t’ju ndihmojë mjaft, në se secili prej jush do të përqëndrohet tek detyra e tij. Ju mund të përgatitni pyetje për njëri-tjetrin si dhe të kontrolloni përgjigjet. Kjo do t’ju nxisë dhe do të rrisë nivelin e përqëndrimit.
PAK PARA PROVIMIT:
1. Bëni një përsëritje të të gjitha shënimeve mbrëmjen para provimit. Më pas, mos bëni asgjë që mund të ndërhyjë tek ato që përsëritët, si p.sh., të shkoni në një festë.
2. Zgjohuni pak më herët se zakonisht në mëngjes në mënyrë që të përsëritni
edhe një herë shënimet.
3. Merrni me vete të gjitha materialet e nevojshme për provimin. P.sh., orën, letrat, lapsat dhe stilolapsat që mund t’ju duhen.
4. Jini të përpiktë. Vajtja me vonesë krijon premisa për një performancë të dobët në provim. Gjithashtu, duhet shmangur vajtja herët. Të tjerët mund t’ju shpërqendrojnë.
GJATE PROVIMIT:
1. Uluni në një vend të qetë, larg njerëzve të zhurmshëm.
2. Lexoni të gjitha udhëzimet e provimit para se të filloni. Gjithashtu, mendohuni mirë për ato që kërkohen, para se të filloni.
3. N.q.s. nuk e dini përgjigjen e njërës pyetje, kujtohuni që për të kaluar, nuk
duhet t’u përgjigjeni saktë të gjitha pyetjeve.
4. Filloni aty ku ndiheni më mirë. Përgjigjuni fillimisht pyetjeve që dini më mirë në mënyrë që të ndiheni më të sigurt dhe pastaj kaloni tek ato më të vështirat.
5. Mos e shpërdoroni kohën kot. Mos harxhoni më shumë kohë seç duhet për një pyetje.
6. Shfrytëzojeni të gjithë kohën që keni në dispozicion. Nuk është e nevojshme të mbaroni të parët. N.q.s. mbaroni shpejt, shfrytëzojeni kohën e mbetur për përsëritjen e përgjigjeve dhe për korrigjimin e gabimeve për shkak të shpejtësisë.
Autor: Jill Lewis, “Studimi akademik”
Përgatiti: Prinderimi.com
