Pas thirrjes ndërgjegjësuese nga Rrjeti i Prindërve të Kosovës, në lidhje me sfidën virale tashmë të njohur edhe për publikun shqiptar si ”Sfida Supermen” ose ”Superman Challenge” në platformën TikTok, janë paraqitur edhe njoftimet e para për lëndimet e nxënësve që përfshihen në këto sfida, njofton Prinderimi.com
Një rast është njoftuar nga radio lokale e qytetit të Istogut, Radio West, se në SHFMU “Martin Camaj” në Gurrakoc, në përfshirjen në “Sfidën e Supermenit” janë përfshirë disa nxënës të një klase të tetë të kësaj shkolle e me ç’rast nxënësja S.B ka përfunduar në spital, pas lëndimeve të marra pas përfshirjes në sfidë.
Drejtori i DKA-së i kësaj komune, ka kërkuar nga drejtorët e shkollave që nga e hëna të mbahet një sesion informues për nxënësit rreth përdorimit të rrjeteve sociale.
Rrjeti i Prindërve të Kosovës pas publikimit të lajmit parandalues, ju bën apel të gjithëve që platformave si TikTok t’u vihet një kufij i përdorimit, të ndalohet përhapja e mëtejshme e materialeve të tilla që promovojnë sjellje të tilla të rrezikshme.
Për të parandaluar dëme të mëtejshme, thirrja i drejtohet të gjithë prindërve, mësimdhënësve dhe kujdestarëve që të angazhohen fuqishëm në mbikëqyrjen e aktivitetit të fëmijëve në rrjetet sociale dhe të bisedojnë haptaz me nxënësit për rreziqet që bartin këto trende. Imitimi i veprimeve të rrezikshme nuk është mënyra e duhur për të fituar popullaritet apo vëmendje në internet.
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
