Shtatë shkolla në Komunën e Prishtinës do t’i bashkohen programit të mësimit gjithëditor nga muaji shtator, pesë prej tyre në fshatra. Por, vonesat në miratimin e buxhetit po rrezikojnë funksionimin e projekteve, përfshirë edhe sigurimin e shujtave për nxënësit.
Shtatë shkolla në kryeqytet pritet t’i bashkohen programit të mësimit gjithëditor nga shtatori, pesë prej tyre në fshatra. Kështu shprehet drejtori i Arsimit, Samir Shahini.
“Duke filluar nga fshati Grashticë, Mramor, Llukarë, Barilevë dhe Kishnicë. Dy të tjera në qytet janë pastaj shkollat, “Zenel Hjadini” e cila hyn në kombinim me shkollën “Asim Vokshi” për shkëmbim të nxënësve dhe rregullimin e cikleve të ndara 6-9 kalojnë në “Asim Vokshi” e 1-5 në “Zenel Hajdini” e pastaj “Pjetër Bogdani” dhe “Emin Duraku” ku “Pjetër Bogdani” fillon me mësim tërëditor për ciklin 1-5 derisa “Emin Duraku” pret ose është nikoqir i nxënësve 6-9 dhe kolegtivit të shkollës “Pjetër Bogdani”.
Megjithatë, Shahini paralajmëron për një problem që mund të shfaqet në këtë projekt. Thotë se vonesat në miratimin e buxhetit komunal po rrezikojnë seriozisht funksionimin e projekteve arsimore, përfshirë edhe ofrimin e shujtave për nxënësit.
“Jemi në korrik dhe ende nuk e kemi buxhetin. Çdo ditë që kalon është kosto e jashtëzakonshme në adresimin e projekteve të cilat kërkojnë finalizim. Mos harroni, afatet e shkollave, të prindërve në këtë rast dhe të nxënësve, nuk janë të lidhura ngusht me afatet e planifikimit të buxhetit ose të tekeve të Kuvendit Qendror të Kosovës, sepse shtatori është këtu”, tha ai për RTK.
Për shkak të mosrealizimit të pagesave që varen nga buxhetit i këtij viti, Shahini e pranon për borxhet që kanë ndaj ndërmarrjes komunale “Kuzhina e Kryeqytetit”.
“Jemi me mijëra euro borxh te kuzhina e kryeqytetit që rrezikon mos shërbim, mos ofrimi të shërbimit nga shtatori për këta nxënës, për mungesë të një buxheti i cili është i planifikuar. Mbi 1 milion e 800 mijë euro janë të planifikuara për buxhetin e vitit 2025 vetëm për shujta për këta nxënës, por nuk janë të qasshme, nuk janë të shfrytëzueshme sepse buxheti i vitit 2025 derisa nuk është i aprovuar, ne funksionojmë me buxhetin e vitit 2024 edhe ato të ndara në tranzhe”, theksoi Shahini.
Me gjithë sfidat, Drejtoria e Arsimit në Prishtinë thotë se do të vazhdojë të punojë me zgjidhje alternative dhe me partnerë lokalë për të siguruar vazhdimësinë e shërbimeve, deri në zhbllokimin e situatës buxhetore.
Kujtojmë faktin se mësimi tërëditor ka filluar edhe në pesë shkolla të ndryshme në Prisshtinë.
Kjo situatë dëshmon qartë për një ndërprerje serioze të koordinimit mes nivelit lokal dhe atij qendror, ku mungesa e miratimit me kohë të buxhetit komunal nuk është vetëm një çështje teknike, por një pengesë reale për jetën shkollore të mijëra nxënësve. Ndërkohë që programi i mësimit gjithëditor është një hap pozitiv drejt përmirësimit të cilësisë arsimore dhe barazisë në qasje, mungesa e shujtave ushqimore – veçanërisht për nxënësit në fshatra – kërcënon të zbehë ndjeshëm ndikimin pozitiv të këtij programi.
Mësimi gjithëditor kërkon edhe përkujdesje për aspektin social të nxënësve, ku ushqimi është element themelor. Nëse këto shërbime mungojnë, rrezikojmë që shumë prindër të hezitojnë t’i mbajnë fëmijët gjatë gjithë ditës në shkollë, veçanërisht ata nga familje me të ardhura të ulëta.
Për rrjedhojë, është thelbësore që institucionet përkatëse të gjejnë urgjentisht një zgjidhje për zhbllokimin e fondeve dhe të vënë në prioritet absolut nevojat e fëmijëve.
