Në Kosovë është publikuar udhërrëfyesi digjital “Nga qasja digjitale te kompetencat digjitale: Analizë gjithëpërfshirëse e integrimit të kompetencave digjitale në sistemin e arsimit parauniversitar në Kosovë”, një dokument që synon të mbështesë reformimin dhe transformimin digjital të sistemit arsimor.
Publikimi u bë në kuadër të një ngjarjeje të përbashkët të UNICEF-it, Ministrisë së Arsimit dhe Shkencës (MASh) dhe Ministrisë së Digjitalizimit dhe Administratës Publike (MDAP). Në aktivitet morën pjesë përfaqësues të institucioneve vendore, partnerë zhvillimorë dhe profesionistë të fushës së arsimit, të cilët diskutuan rëndësinë e zhvillimit të kompetencave digjitale tek nxënësit dhe mësimdhënësit.
Studimi ofron një analizë të gjendjes aktuale të kompetencave digjitale në arsimin parauniversitar. Ai trajton aftësitë digjitale të nxënësve dhe mësimdhënësve, mënyrën se si këto kompetenca janë të integruara në kurrikulë, politikat ekzistuese, infrastrukturën teknologjike dhe gatishmërinë e institucioneve për të përballuar kërkesat e një sistemi arsimor gjithnjë e më të digjitalizuar.
Gjatë aktivitetit, ministri në detyrë i Digjitalizimit dhe Administratës Publike, Lulëgzon Jagxhiu, theksoi se digjitalizimi i arsimit është një nga shtyllat kryesore të transformimit digjital të vendit. Sipas tij, teknologjia nuk duhet të jetë në qendër të këtij procesi, por nxënësi dhe mësimdhënësi. Qëllimi është që përdorimi i teknologjisë të kontribuojë në një arsim më cilësor, gjithëpërfshirës dhe të përshtatshëm për sfidat e së ardhmes.
Ndërkaq, zëvendësministri në detyrë i Arsimit dhe Shkencës, Përparim Kryeziu, tha se publikimi i udhërrëfyesit vjen në një moment të rëndësishëm, veçanërisht për faktin se ka nisur hartimi i Strategjisë së re 10-vjeçare të Arsimit. Ai theksoi se kompetencat digjitale janë të domosdoshme për përgatitjen e nxënësve për shkollim të mëtejshëm, tregun e punës dhe pjesëmarrjen aktive në shoqëri.
Shefja e Zyrës së UNICEF-it në Kosovë, Veronika Vashchenko, nënvizoi se fëmijët dhe të rinjtë po rriten në një botë digjitale dhe se vetëm sigurimi i pajisjeve dhe qasjes në teknologji nuk është i mjaftueshëm. Sipas saj, çdo fëmijë duhet të ketë mundësi të zhvillojë kompetenca digjitale kritike, ndërsa mësimdhënësit duhet të kenë mbështetjen dhe vetëbesimin e nevojshëm për përdorimin kuptimplotë të teknologjisë.
Në aktivitet, Krenare Pireva Nuçi, profesoreshë asistente në Fakultetin e Edukimit dhe njëra nga autoret e analizës, prezantoi gjetjet kryesore dhe rekomandimet e studimit, duke u fokusuar veçanërisht në integrimin e aftësive digjitale në kurrikulën parauniversitare.
Udhërrëfyesi synon të shërbejë si bazë për vendimmarrje dhe planifikim, me qëllim që digjitalizimi i arsimit në Kosovë të mos kufizohet vetëm në qasje ndaj teknologjisë, por të shndërrohet në zhvillim të qëndrueshëm të kompetencave që u nevojiten nxënësve dhe mësimdhënësve.
Në këtë drejtim, rëndësi e veçantë i kushtohet krijimit të një mjedisi arsimor ku teknologjia përdoret në mënyrë të sigurt, të përgjegjshme dhe me qëllim të qartë pedagogjik. Zhvillimi i kompetencave digjitale pritet t’i ndihmojë nxënësit të bëhen përdorues më kritikë, kreativë dhe të përgjegjshëm të teknologjisë, duke i përgatitur më mirë për kërkesat e shoqërisë dhe të tregut të punës.
Prinderimi.com
