Nga Lira Gjika
Që fëmija të vijë në këtë botë duhet të largohet nga barku i nënës pasi nuk ka rrugë tjetër. Po nuk u largua nga ai “vend” ku është ndjerë i sigurt e i mbrojtur, mund të mos e njohë jetën, as nënën e as babanë. Kështu që ai i mbledh të gjitha forcat e energjitë dhe del nga trupi i nënës. Dhe ky proces nuk është një shaka, ai foshnja e kryen të gjithë këtë udhëtim i vetëm, po i shoqëruar nga muzika e zemrës së nënës. Pasi vjen në këtë botë dhe nëna e babai e mirëpresin me gëzim, ai foshnja fillon një punë të madhe, të njohë nënën aromën, fytyrën zërin dhe fjalën e saj. Ai, ajo duhet të mësojnë sa më shpejt fjalën, po që të mësojnë atë duhet të boshatisin gojën nga gjiri i nënës që i shuajti urinë dhe i mësoi kënaqësinë. Ndryshe koha ikën e ajo apo ai mbeten prapa me fjalën që ti përgjigjen apo të pyesin nënën apo babain. Edhe kjo “punë” kërkon një përqendrim të veçantë që do ti duhet kohë ta perfeksionojë. Edhe gjiri dhe biberoni u la mënjanë.
Po na doli një “problem” i ri, duhet të mësojë të eci vetë. E që të ndodhe ky proces duhet të iki nga krahët e nënës e të lëvizi vetë në mjedis. “Punë e vështirë” se për çfarë të mendojë më parë për fjalën apo të ecurën po i del edhe një problem tjetër të kontrollojë atë urinimin dhe defekimin që të rrijë rehat dhe jo kohë e pa kohë i lagur. Po të gjitha në një kohë ndodhin këto gjëra? Nuk ka kohë tjetër, kjo fëmijëria qenka e vështirë. Të gjithë thonë se je i vogël dhe je rehat po të gjithë këto punë me veten nuk ja bëjnë të tjerët po ai vetë, me mendjen e përqendrimin e tij. Po këta të rriturit pse nuk e kuptojnë apo nuk e vlerësojnë “punën” e tij të madhe për të folur për të ecur për të fituar kontrollin sfinkteriap. Po ato dhëmbët që ndërrohen po në të njëjtën kohë dhe dalin ato të rejat që janë një problem më vete. Prindër këto punë fëmija i bën vetë dhe i vetëm prandaj ndihmojini nga pak dhe ju.
Lehtësojeni procesin e rritjes duke shmangur frikën dhe shtoni inkurajimin edhe kur pengohet apo sëmuret mos u trembni. Kaq keni në dorë, çdo gjë fëmija e realizon vetë, nganjëherë me vështirësi nganjëherë duke qeshur e kënaqur./dritare.net
