Sot, me 17 dhjetor 2024, u bë përmbyllja e projektit rajonal “Sigurimi i cilësisë për punën e koordinatorëve përgjegjës për marrëdhëniet me biznesin” 2022-2024, i cili ka luajtur një rol të rëndësishëm në forcimin e lidhjeve mes institucioneve arsimore dhe sektorit privat.
Ky projekt ka pasur cilësinë si prioritet kryesor, duke kontribuar në zhvillimin e kapaciteteve të koordinatorëve dhe duke përmirësuar bashkëpunimin mes arsimit dhe biznesit. U theksua se ngritja e cilësisë së arsimit ka qenë një nga prioritetet kryesore, me fokus të veçantë në implementimin e mësimit dual.
Në vitin 2022 u iniciuan 4 profile të mësimit në praktikë, ndërsa tani janë 12 profile të implementuara në 25 shkolla dhe 14 komuna, përfshirë 1607 nxënës. Ky projekt ka kontribuar në përmirësimin e cilësisë së arsimit profesional në Kosovë, Shqipëri dhe Maqedoninë e Veriut.
Ambasadori i Austrisë në Kosovë, Georg Schnetzer, theksoi rëndësinë e arsimit të lartë dhe aftësimit profesional për bashkëpunimin mes dy shteteve dhe përshëndeti përpjekjet për zhvillimin e këtij sektori. Udhëheqësja e Departamentit OeAD, Elisabeth Augustin, shpjegoi se Agjencia për Arsim dhe Ndërkombëtarizim do të vazhdojë të mbështesë përpjekjet e vendeve të Ballkanit Perëndimor për të avancuar në procesin e aderimit në BE, duke ofruar mbështetje sistemore dhe të qëndrueshme.
Ky projekt ka pasur një ndikim të madh në rritjen e cilësisë së arsimit dhe ka ofruar mundësi të reja për zhvillimin e marrëdhënieve mes arsimit dhe biznesit në rajon.
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
