Për shumë adoleshentë të sotëm, shtëpia është shndërruar thjesht në një hotel dhe restorant. Krijimi i një mjedisi shtëpiak më të lumtur dhe të paqtë, si për prindërit ashtu edhe për fëmijët, është domosdoshmëri. Shtëpia nuk është vetëm një vend fizik, ajo është edhe një inkubator, një platformë dhe një skenë ku anëtarët e familjes janë aktorët, ndërsa komunikimi është skenari. Çdo individ duhet të mësojë si ta “luajë” rolin e vet në këtë skenë.
Është për të ardhur keq të shohim se shumë prindër dhe fëmijë sot nuk arrijnë të krijojnë marrëdhënie të shëndetshme me njëri-tjetrin, duke shkaktuar kështu një ambient të tensionuar familjar. Disa prej tyre jetojnë me frikë ose mosbesim ndaj njëri-tjetrit dhe shumë nuk e dinë se si ta përmirësojnë marrëdhënien. Në raste të tilla, ndodh që ata të dorëzohen përpara vështirësive, duke u tërhequr emocionalisht dhe përfundimisht heqin dorë nga përpjekjet për të ndërtuar një lidhje më të mirë.
Prindërimi është një përgjegjësi e madhe, por nuk duhet të trajtohet me dëshpërim. Asnjëherë nuk është vonë për të kapërcyer sfidat. Marrëdhëniet tona familjare mund të përmirësohen nëse shmangim fajësimin e vetes për gabimet e së kaluarës dhe fokusojmë energjinë tonë drejt ndërtimit të një ambienti më të ngrohtë dhe të shëndetshëm.
Nuk ka dobi të themi: “Sikur vetëm ta kishim bërë këtë, e të mos e kishim bërë atë.” Keqardhjet dhe ndalesa e vazhdueshme mbi skenarin “vetëm sikur” janë shkatërrimtare dhe nuk shërbejnë për asgjë tjetër, përveçse për të na mbajtur të lënduar. Edhe pse mund të kemi bërë zgjedhje të gabuara që kanë lënduar familjet tona, duhet të kujtojmë se qëllimet tona kanë qenë të mira.
Duhet të kalojmë më pak kohë duke shikuar pas dhe më shumë kohë duke shikuar përpara. Në vend që të përqendrohemi te çfarë kemi mundur apo është dashur të bëjmë, duhet të fokusohemi te ajo që mund të bëjmë tani, për të ndërtuar një të ardhme më të ndritur.
Ne mund t’u premtojmë fëmijëve tanë se do të përmirësojmë veten duke u bërë prindër më të mirë, duke e konsideruar të kaluarën si një leksion dhe të ardhmen si një mundësi për ndryshim. Na ndihmon të përfytyrojmë të kaluarën si mermer të skalitur apo beton të forcuar, ndërsa të ardhmen si argjilë të butë, që mund të formësohet.
Autor: H. Altalib, O. Altalib dhe A. Ebusulejman, 2022
Udhëzues për rritjen e fëmijëve: Marrëdhëniet prind-fëmijë
