Kurrë nuk është vonë
Ne të gjithë e kuptojmë sesa më herët t’i lexojmë fëmijës dhe ta bëjmë atë të lexojë dhe sa më herët që e ngjallim interesimin e tij dhe praktikën e leximit, aq më mirë është. Megjithatë, ndoshta do të jetë tepër vonë kur arrijmë ta kuptojmë këtë ose mund të ketë rrethana të caktuara që rezultojnë në mospërgjigjen e fëmijës ndaj përpjekjes sonë, mirëpo nuk ka asnjë arsye që të mendojmë që është tepër vonë për fëmijën që të përfitojë pasionin e të lexuarit.
Ne njohim shumë adoleshentë, të cilët e fituan shprehinë e të lexuarit në shkollën fillore ose të mesme. Ka edhe njerëz që e kanë fituar dashurinë për librat në të tridhjetat ose madje në të dyzetat. Qëllimi është që kurrë të mos humbet shpresa, kurrë të mos heqim dorë nga inkurajimi i fëmijës. Përveç kësaj, duhet të hulumtojmë me durim dhe në tërësi për atë që i bën fëmijët të mos i përgjigjen këshillave për të lexuar.
Në të vërtetë, shumë prindër përvetësojnë mënyra të gabuara për t’ua bërë të dashur leximin fëmijëve, të cilat në fakt i dekurajojnë dhe i zmbrapsin nga leximi. Megjithatë, është e drejtë të themi se disa familje nuk arrijnë sukses, edhe pse u përmbahen mënyrave më të mira të bërjes së leximit të dashur.
Ata dështojnë të mbjellin në familjet e tyre pasionin e leximit. Ka shumë gjasë në këtë rast që mësuesi është fajtor, sepse disa mësues shkaktojnë te fëmijët humbje të dëshirës për të lexuar. Nganjëherë shokët e fëmijës janë përgjegjës për ftohjen e tij nga leximi ose fëmija mund të ketë vështirësi në mësim, të cilat e pengojnë aftësinë e tij për të lexuar, pa qenë familja ose shkolla e vetëdijshme për këtë.
Nga tërë kjo, duhet të jemi vigjilent për të gjetur mënyrat e duhura të edukimit dhe udhëzimit, pa harruar asnjëherë lutjet e përzemërta për sukses.
Përgatiti: Prinderimi.com
Autor: Dr. Abdulkerim Bekkar, ”Fëmija lexon”
