Gjatë pushimeve verore, fëmijët kalojnë më shumë kohë në shtëpi dhe jashtë ambienteve të shkollës, duke kërkuar mënyra argëtimi dhe freskimi. Pishinat, vaskat, uji në oborr apo edhe një pishinë plastike e improvizuar kthehen në vendet më të dëshiruara për të kaluar ditët e nxehta.
Nën diellin përvëlues, fëmijët ndihen të lirë, të lumtur dhe me dëshirë të pangopur për të qëndruar me orë të tëra në ujë. Ky është një moment i artë për argëtim, por njëkohësisht edhe periudha më kritike për rreziqet që lidhen me mbytjen.
Prindërit shpesh përballen me kërkesën e vazhdueshme të fëmijëve për të “mos dalë kurrë nga pishina”. Ajo kthehet në një magnet argëtimi dhe ndonjëherë në një hapësirë që krijon ndjesinë e rehatisë dhe sigurisë së rreme. Fëmijët mund të lodhen, të shpërqendrohen ose të bien në ujë pa e vënë re askush, sidomos në pishina të vendosura në oborr ose pishina të fryra që nuk janë rrethuar e as të monitoruara vazhdimisht. Për këtë arsye, pushimet verore kërkojnë masa shtesë të mbikëqyrjes dhe edukimit për sigurinë në ujë, sepse është pikërisht kjo periudhë kur incidentet fatale ndodhin më shpesh.
Uji, sado freskues, është gjithmonë një potencial vdekjeprurës, veçanërisht për fëmijët. Ky realitet duhet të jetë temë thelbësore në çdo bisedë prindërore.
Pishina: Kënaqësi dhe një rrezik i madh
Shumica e mbytjeve ndodhin në pishinat e shtëpive. Uji i qetë në dukje është një rrezik i padukshëm. Një fëmijë mund të mbytet në më pak se dy minuta, në heshtje.
Bëni një gardh sigurie prej të paktën 1.2 metra përreth të gjitha anëve të pishinës tuaj, me portë vetë-mbyllëse dhe vetë-kyçëse. Shtoni alarme drita/tingull në dyert e shtëpisë që çojnë te pishina.
Mbytja nuk ndodh vetëm në pishina të mëdha të qyteteve, por ndodhë edhe në oborret tona. Edhe një kovë, një vaskë ose një pishinë fëmijësh me 10 cm ujë janë të mjaftueshme. Zbrazni dhe ruani çdo enë uji pas përdorimit. Siguroni kapakët e kovave të mëdha dhe mos lini lodra pranë pishinës që mund të tërheqin fëmijët drejt saj.
Edukimi dhe komunikimi: Fjalët që mund të shpëtojnë jetë
Bëjini fëmijët tuaj të vetëdijshëm që uji, sikurse rruga apo makinat, ka nevojë për rregull. Vendosni rregull të hekurt: nuk afrohet njeri tek uji pa një të rritur prezent. Prindërit duhet të flasin rregullisht dhe të ndajnë histori për të rritur ndërgjegjësimin. Të folurit e hapur shpesh sjell masa konkrete parandaluese.
Aftësitë që shpëtojnë jetë: Noti
Fëmijët që mësojnë notin në moshë të hershme kanë më pak gjasa të mbyten. Mësimet e notit duhet të konsiderohen pjesë e kujdesit shëndetësor bazë. Rekomandohet fillimin e notit për fëmijët nga mosha 1 vjeçare, në varësi të gatishmërisë individuale.
Mbani pishinën të mbuluar kur nuk është në përdorim. Instaloni alarme lundruese dhe mbani gjithmonë pajisje shpëtimi afër. Pas çdo kohe loje, pastroni zonën nga lodrat. Mbani flokët e fëmijëve të lidhur dhe shmangni rrobat me lidhëse që mund të kapen në kulluese.
Këshilla për prindërit
Prindër: mos e lini jetën e fëmijës tuaj në dorë të kënaqësisë së momentit. Investoni në gardhe sigurie, mësime noti dhe njohuri për sigurinë. Flisni hapur për sigurinë në ujë. Bashkohuni për të ndryshuar ligjet lokale për mbrojtjen e fëmijëve. Sepse çdo veprim i vogël që bëjmë sot, është një jetë më shumë që nuk humbet nesër.
Mos harroni:
-
Mbytja ndodh shpejt dhe pa zhurmë – vetëm pak sekonda shpërqendrim mund të jenë fatale.
-
Shumica e incidenteve ndodhin në shtëpitë me pishina të pa-rrethuara dhe pa mbikëqyrje aktive.
-
Edukimi i hershëm për notin dhe sigurinë në ujë rrit ndjeshëm gjasat që një fëmijë të reagojë në mënyrë të sigurt në situata të rrezikshme.
-
Ligjet lokale shpesh janë të pamjaftueshme, prandaj është detyra jonë si prindër të kërkojmë mbrojtje më të fortë për fëmijët tanë.
-
Çdo investim në siguri është më pak i kushtueshëm sesa humbja e jetës së një fëmije – dhe ky është një çmim që askush nuk duhet ta paguajë.
