Sot shënohen 26 vjet që kur muaji korrik u shpall Muaji Ndërkombëtar i Ndërgjegjësimit për Streptokokun e Grupit B (GBS) në Mbretërinë e Bashkuar. Që nga fillimi, ky muaj shërben si një periudhë ndërgjegjësimi, gjatë së cilës individë, familje dhe institucione shëndetësore ndajnë informacione, përvoja dhe këshilla për të rritur njohuritë rreth kësaj bakterie dhe për të promovuar shëndetin e nënave dhe foshnjave.
Tabela e përmbajtjes
Çfarë është Streptokoku i Grupit B (GBS)?
Streptokoku i Grupit B (GBS) është një bakter që gjendet natyrshëm në zorrë ose në traktin e poshtëm gjenital të shumë të rriturve të shëndetshëm. Në shumicën e rasteve ai nuk shkakton simptoma dhe nuk paraqet rrezik për personin që e bart. Megjithatë, gjatë shtatzënisë dhe sidomos gjatë lindjes, bakteri mund të transmetohet nga nëna tek foshnja.
Sipas Organizatës Botërore të Shëndetësisë (WHO), GBS lidhet çdo vit me mbi 500 000 lindje të parakohshme dhe rreth 150 000 raste të vdekjeve fetale ose të foshnjave në mbarë botën. Këto shifra tregojnë rëndësinë e diagnostikimit dhe trajtimit në kohë.
Edhe pse shumica e foshnjave që ekspozohen ndaj GBS nuk sëmuren, një pjesë e vogël mund të zhvillojnë infeksione serioze si:
- Sepsë (infeksion i gjakut);
- Pneumoni;
- Meningjit.
Tek të porsalindurit, shenjat më të zakonshme përfshijnë temperaturë të lartë ose të ulët, vështirësi në ushqyerje, përgjumje të tepërt ose letargji, irritueshmëri, vështirësi në frymëmarrje dhe ndryshim të ngjyrës së lëkurës, e cila mund të bëhet e kaltër. Nëse shfaqet ndonjë nga këto simptoma, foshnja duhet të dërgohet menjëherë për vlerësim mjekësor.
Pse është e rëndësishme ta shënojmë këtë muaj?
Muaji Ndërkombëtar i Vetëdijesimit për GBS na kujton se informimi mund të shpëtojë jetë. Shënimi i tij ndihmon në:
- Rritjen e njohurive rreth GBS dhe mënyrave të parandalimit;
- Nxitjen e kujdesit më të madh për gratë shtatzëna dhe foshnjat;
- Inkurajimin e familjeve për të ndarë përvojat e tyre, duke ndihmuar prindërit e tjerë të njohin rreziqet dhe shenjat paralajmëruese.
Çfarë duhet të dinë prindërit?
Thënia “Parandalimi është më i lehtë se shërimi” është veçanërisht e rëndësishme në këtë muaj. Nënat shtatzëna duhet të ndjekin rregullisht kontrollet prenatale dhe të bisedojnë me gjinekologun ose maminë për rrezikun e GBS. Në disa vende rekomandohet depistimi në javët 35–37 të shtatzënisë, ndërsa në vende të tjera mjekët vlerësojnë praninë e faktorëve të rrezikut për të vendosur nëse nevojitet trajtim me antibiotikë gjatë lindjes. Antibiotikët e dhënë gjatë lindjes ulin ndjeshëm rrezikun e transmetimit të bakterit tek foshnja.
Prindërit duhet të jenë gjithashtu të informuar për shenjat e infeksionit tek i porsalinduri edhe pas daljes nga spitali dhe të kërkojnë menjëherë ndihmë mjekësore nëse vërejnë simptoma shqetësuese.
Si mund të bëhemi pjesë e fushatës ndërgjegjësuese?
Secili mund të kontribuojë në rritjen e ndërgjegjësimit për GBS. Ndarja e informacionit të bazuar në fakte, bisedat me familjarët dhe miqtë, shpërndarja e materialeve edukative në rrjetet sociale dhe mbështetja e organizatave që punojnë për shëndetin e nënës dhe foshnjës janë disa mënyra të thjeshta për t’u bërë pjesë e kësaj nisme.
Sa më shumë të flasim për GBS, aq më shumë prindër do të jenë të informuar dhe të përgatitur për të mbrojtur shëndetin e fëmijëve të tyre.
