Komuna e Prizrenit, Istogut, Junikut, Mitrovicës, Gjakovës e Pejës, përmes njoftimeve zyrtare për media, i janë bashkuar vazhdës për ndalimin e përdorimit të doracakëve “Edukimi Seksual dhe Shëndeti Riprodhues” të publikuara nga MASHTI, njofton Prinderimi.com
Lidhur me materialet e shëmtuara të hartuara e promovuara nga MAShTI për ”edukimin seksual”, kanë reaguar edhe komunarët e tjerë duke e ndaluar përdorimi e tyre dhe duke i dhënë një JO të madhe kalimit të këtij projekti, të cilësuar me të drejtë: kundër çdo vlere njerëzore.
”Drejtoria Komunale e Arsimit në Komunën e Prizrenit me kohë ka vërejtur se materialet e përgatitura nga MAShTI lidhur me edukimin seksual nuk i plotësojnë kriteret e zbatueshmërisë, dhe se programi i tillë nuk përkon me kontekstin kulturor dhe normat e shëndosha shoqërore. Pavarësisht se në këto materiale mund të ketë ‘importe’ të praktikave të ndryshme në vendet evropiane, megjithatë nuk përkojnë me realitetin tonë dhe nuk na ndihmon në rrugën tonë të angazhimit të komunitetit arsimor drejt një rinie të shëndoshë me mendim kritik të zhvilluar. Andaj materialet e këtilla kurrë nuk kanë gjetur zbatim në komunën tonë, duke shmangur kështu dëmet e mundshme shoqërore dhe sidomos dëmet në procesin e arsimimit të brezave të rinj.’‘ janë shprehur zyrtarët komunal të arsimit në Komunën e Prizrenit.
Kësisoji edhe Komuna e Istogut pezulloi përdorimin e doracakëve, duke i cilësuar ata si të papërshtatshëm. Njoftimin për ndalimin e tyre e bëri të ditur Kryetari i Komunës, Ilir Ferati i cili nënshkroi vendimin dhe e bëri të ditur për mediat.
Vendimin e ngjajshëm e ka përcjellur për mediat zyrtare edhe Komuna e Junikut duke nxjerrë vendimin që të mos trajtojë përmbajtje që rrjedhin nga doracaku, me qëllim të ruajtjes së integriteti dhe mirëqenies së fëmijëve.
Komuna e Mitrovicës njoftoi opinionin e gjerë përmes drejtoreshës së arsimit, Drita Kadriu, se kanë pezulluar përdorimin e doracakëve të turpit, në të gjitha shkollat e kësaj komune, me qëllim të rishikimit dhe redaktimit të përmbajtjes.
Përmbajtja e doracakëve ka hapur një diskutim më të gjerë mbi rolin e arsimit në formimin e qëndrimeve dhe sjelljeve të shëndetshme, duke përfshirë rolin e prindërve, mësimdhënësve dhe institucioneve arsimore. Debati ka nxitur gjithashtu shqetësime për nevojën e standardeve të qarta dhe të harmonizuara për mësimdhënien e këtyre temave. Vazhdën e reagimeve e përcjellur me kujdes edhe komuna e Pejës dhe ajo e Gjakovës
Komuna e Pejës përmes një vendimi zyrtar miratoi moszbatimin e doracakëve të dhënë nga MASHTI, duke siguruar se mësimdhënia të realizohet vetëm me qëllim të ruatjes së integriteti dhe mirëqenies së fëmijëve, që të respektohen të drejtat e fëmijve dhe interesat e tyre.
Ndërsa Komuna e Gjakovës, përveç ndalim-përdorimit të doracakëve, ndaloi edhe pjesmarrjen në aktivitetet dhe trajnimet për të gjithë mësimdhënësit e kësaj komune. Edukimi i fëmijëve sipas të parëve të komunës, duhet të jetë ”i shëndoshë dhe i sigurtë.”.
Kujtojmë faktin se Komuna e Prishtinës, Fushë Kosovës, Skenderajit, Vitisë, Drenasit, Rahoveci, Deçanit, Lipjanit dhe ajo e Vushtrrisë përmes njoftimeve zyrtare për media, kishin bërë të ditur se kanë vendosur të ndalojnë përdorimin e doracakëve “Edukimi Seksual dhe Shëndeti Riprodhues” të publikuara nga MASHTI.
© Prinderimi.com | Të gjitha të drejtat e rezervuara.
