Ministria e Arsimit dhe Shkencës (MASh) ka hapur tri skema të mbështetjes financiare për doktorantët dhe kërkuesit shkencorë, në kuadër të Programit Kombëtar të Shkencës 2023–2028. Nisma synon të përkrahë zhvillimin akademik, të forcojë hulumtimin shkencor dhe të krijojë mundësi më të mira për studiuesit nga Kosova.
Sa është vlera e mbështetjes financiare?
Sipas njoftimit zyrtar të ministrisë, mbështetja ndahet në tri kategori:
– 3,000 euro për studimet e doktoratës në institucionet publike të arsimit të lartë në Kosovë.
– 8,500 euro në vit për studimet e doktoratës jashtë vendit.
– 10,000 euro për hulumtime postdoktorale jashtë vendit.
Kjo është hera e parë që ministria ofron mbështetje të dedikuar për studentët e doktoratës në institucionet vendore.
Kush mund të aplikojë për doktoratë brenda Kosovës?
Për bursën prej 3,000 eurosh mund të aplikojnë shtetasit e Republikës së Kosovës që ndjekin studimet e doktoratës në institucione publike të arsimit të lartë në vend. Kandidatët duhet t’i kenë regjistruar studimet në vitin akademik 2024/2025 ose 2025/2026, të vazhdojnë studimet gjatë vitit 2026/2027, t’i kenë përfunduar provimet e vitit të parë dhe ta kenë të miratuar zyrtarisht temën e doktoratës.
Hulumtimi duhet të adresojë sfida zhvillimore të Kosovës dhe të jetë në përputhje me prioritetet kombëtare shkencore. Përparësi u jepet kandidatëve me rezultate më të mira shkencore, publikime, bashkëpunime kërkimore dhe atyre që nuk përfitojnë mbështetje tjetër financiare. Kandidatët që sapo regjistrohen në vitin e parë nuk kualifikohen.
Po për doktoratën jashtë vendit?
Për mbështetjen prej 8,500 eurosh mund të aplikojnë shtetasit e Kosovës që ndjekin doktoratën në një nga 1,000 universitetet më të mira në botë, sipas renditjes QS World University Rankings 2026/2027. Kërkohen dokumente që dëshmojnë regjistrimin dhe vijimin e studimeve, ndërsa përparësi kanë kandidatët pa bursë tjetër dhe ata që studiojnë në universitete me renditje më të lartë.
Si bëhet aplikimi dhe cili është afati?
Për të dyja skemat e doktoratës, dokumentet dorëzohen fizikisht në zarf të mbyllur, në zyrën e arkivit të MASh-it, në rrugën “Agim Ramadani”, Prishtinë. Afati përfundimtar është 3 nëntor 2026, ora 16:00. Dokumentacioni ndryshon sipas skemës, prandaj kandidatët duhet t’i kontrollojnë me kujdes kërkesat në konkurset zyrtare. Për informata shtesë, ministria ka publikuar edhe thirrjen për hulumtime postdoktorale jashtë vendit.
Dokumentet dhe konkurset zyrtare: [MASh – konkurset për doktoratë dhe postdoktoratë]
Në qershor të vitit 2026, Ministria e Arsimit dhe Shkencës hapi thirrjen për bursa për studente në fushat STEM (shkencë, teknologji, inxhinieri dhe matematikë), me qëllim mbështetjen e pjesëmarrjes së vajzave në këto fusha. Për të aplikuar, studentet duhej të ishin regjistruar për herë të parë në vitin akademik 2025/2026 në një program STEM në një institucion publik të arsimit të lartë në Kosovë dhe të kishin përfunduar së paku dy provime të semestrit të parë. Vëmendje e veçantë iu kushtua studenteve nga komunitetet joshumicë, zonat rurale dhe studenteve me aftësi të kufizuara. Aplikimi bëhej përmes platformës e-Kosova, ndërsa afati përfundimtar ishte 22 qershor 2026. Sipas njoftimit të ministrisë, 599 studente u përzgjodhën si përfituese të kësaj skeme.
Mbështetja financiare mund të ndihmojë kandidatët të përqendrohen më shumë në hulumtimin e tyre, veçanërisht kur studimet kërkojnë qasje në literaturë shkencore, mbledhje të të dhënave dhe bashkëpunim me studiues të tjerë. Përmes këtyre bursave, synohet të forcohen kapacitetet kërkimore dhe të krijohen mundësi që njohuritë e fituara të kontribuojnë në zhvillimin e arsimit, ekonomisë dhe shoqërisë në Kosovë.
Kandidatët këshillohen të përgatisin dokumentacionin me kohë dhe të sigurohen që çdo dëshmi i plotëson kriteret e përcaktuara. Respektimi i afatit dhe dorëzimi i një aplikimi të plotë janë hapa të rëndësishëm për shqyrtimin e kandidaturës dhe përfitimin e mundshëm të mbështetjes financiare.
Prinderimi.com
