Cilat janë pikat kyçe në edukatën e tualetit?
Së pari, fëmija duhet përgatitur mendërisht për edukatën e tualetit.
Në muajt para se t’i mësohet zakoni i tualetit, fëmijës i tregohet tualeti dhe duke qenë kureshtar nga natyra, fëmija pyet vetë.
Gjatë ndërrimit të bebelinave kur bën nevojën e madhe, emërtohet fenomeni duke thënë për shembull: “Vogëlushi im paska bërë kakën!”
Mësohet me zhurmën e sifonit. Nuk duhet harruar se shumë fëmijë nuk duan ta mësojnë tualetin ngaqë i tremb zhurma e sifonit. Mos harroni se fëmija mund të ketë frikë nga vrima e tualetit. Përdorni një pajisje të posaçme tualeti që fëmija të ulet lehtësisht.
Fëmija jep vetë të kuptohet se është gati për ta mësuar tualetin. Një fëmijë që më parë urinonte duke ecur, tashmë ndalet, turpërohet dhe bezdiset kur urinon. Kur ta shihni fëmijën që ndalet për ta kryer nevojën, mos u shqetësoni, por duhet t’i thoni: “Po deshe mund ta bësh në tualet. Eja të shkojmë në tualet.” Kjo nuk duhet thënë ndërkohë që fëmija po e kryen nevojën, por në çastin kur e kuptoni se do ta kryejë, ose pasi të ketë mbaruar. Që fëmija të qëndrojë paksa në tualet edhe pasi ka mbaruar, është me dobi, kurse ta detyrosh fëmijën të presë disa minuta në tualet që të mos ngrihet pa bërë gjë, e vështirëson mësimin e tualetit.
Nëse fëmija bën ujët e trashë në tualet, nuk duhet ta shohë jashtëqitjen e tij, sepse dihet se shumë fëmijë, kur shohin jashtëqitjen e tyre tremben dhe nuk duan ta bëjnë më nevojën e madhe në tualet. Nëse fëmija ka ndonjë shqetësim në zonat gjenitale që ia vështirëson ujët e hollë apo të trashë, nuk duhet shtrënguar kurrsesi dhe zakoni i tualetit nuk duhet mësuar në periudhat kur fëmija vuan nga kapsllëku.
Si duhet të veprojë nëna?
Nëse ndiqen me durim këto pika kyçe, nëse nëna pasqyron gjithnjë mirëkuptim e buzëqeshje, do të shihet se i gjithë procesi do të kalojë shumë lehtë. Por, nëse gjatë kësaj periudhe nëna shfaq nervozizëm e padurim apo qëndrime poshtëruese për fëmijën, këtë të fundit do ta përfshija frika e paniku dhe nuk do ta përvetësojë dot zakonin e tualetit.
Përgatiti: Prinderimi.com
Autor: Dr. Adem Güneş, “Si veprojnë fëmijët dhe pse?”
