Në vitet e fundit, është bërë e zakonshme që prindërit të festojnë ditëlindjet e fëmijëve të tyre në shkollë – me ëmbëlsira, dekorime dhe dhurata. Në pamje të parë, kjo sjell atmosferë pozitive, buzëqeshje dhe emocion te nxënësit. Por a kemi menduar ndonjëherë për pasojat më të thella të këtyre festimeve?
Sigurisht, festimi i ditëlindjes e bën një fëmijë të ndihet i veçantë, i dashur dhe i vlerësuar. Mund të forcojë marrëdhëniet shoqërore dhe të rrisë ndjeshmërinë ndërmjet bashkëmoshatarëve. Megjithatë, për fëmijët që nuk kanë mundësi ekonomike, apo që prindërit nuk mund t’u organizojnë festë, kjo përvojë mund të jetë e dhimbshme.
Shumë prej tyre ndihen të përjashtuar, të turpëruar apo më pak të vlefshëm. Ndërkohë, prindërit që nuk mund t’i ndjekin ritmet e festimeve të bujshme të të tjerëve, përballen me ndjenjën e fajit dhe presionin social. Festat në klasë, nga një gëzim i thjeshtë, shndërrohen në burim krahasimi dhe pabarazie sociale.
Ligji për arsimin parauniversitar në Kosovë nuk ndalon festimet e ditëlindjeve, por as nuk i përcakton qartë. Prandaj, vendimmarrja u mbetet shkollave dhe mësimdhënësve, të cilët duhet të vlerësojnë me kujdes ndikimin e tyre në mirëqenien e çdo fëmije.
Shkollat mund të gjejnë mënyra simbolike dhe të barabarta për të shënuar ditëlindjet – një urim i përbashkët, një këngë, një kartolinë apo një aktivitet i thjeshtë gjithëpërfshirës. Qëllimi nuk është të ndalohet gëzimi, por të ruhet dinjiteti dhe ndjeshmëria ndaj çdo nxënësi.
A duhet të ndalohen festimet e ditëlindjeve në shkolla – apo thjesht të rregullohen me ndjeshmëri dhe barazi për të gjithë?
Fatmir Selimi
