Një 14-vjeçar ka humbur jetën pas plagëve të marra nga therja me thikë nga një tjetër i mitur në Prizren, duke çuar alarm për një ngjarje tragjike në mbarë shoqërinë!
Sipas të dhënave nga Insajderi, të marra nga Policia e Kosovës, më 27 gusht, rreth orës 23:45, është raportuar se një i mitur ishte therur me thikë. Policia dhe ekipet e Emergjencës kanë dalë në vendngjarje, ndërsa 14-vjeçari është dërguar në Spitalin Rajonal të Prizrenit. Pavarësisht përpjekjeve të stafit mjekësor, ai nuk ka arritur t’u mbijetojë plagëve.
Në lidhje me rastin është arrestuar një tjetër i mitur, rreth 17 vjeç. Sipas Policisë, gjatë kontrollit te i dyshuari është gjetur dhe sekuestruar një thikë, e cila dyshohet se është përdorur në rast. I dyshuari është ndaluar për 24 orë, ndërsa rasti po hetohet nga Sektori Rajonal i Hetimeve në Prizren. Trupi i pajetë është dërguar në Institutin e Mjekësisë Ligjore për obduksion.
Rrjeti i Prindërve të Kosovës shpreh shqetësim të thellë dhe dënon fuqishëm këtë akt kriminal, për të cilin është marrë nën hetime një tjetër i mitur. Fakti që një ngjarje kaq e rëndë ka ndodhur jashtë mjediseve shkollore, në një hapësirë publike ku fëmijët dhe qytetarët duhet të ndihen të sigurt, e bën situatën edhe më alarmante!
I bëjmë thirrje Komunës së Prizrenit, Policisë së Kosovës dhe institucioneve të tjera përgjegjëse që të ndërmarrin hapa konkretë dhe të koordinuar për rritjen e sigurisë së fëmijëve në hapësirat publike.
Kjo duhet të përfshijë rritjen e patrullimeve policore në zonat ku mblidhen të miturit, sidomos në orët e mbrëmjes; identifikimin e pikave të rrezikshme përmes bashkëpunimit me komunitetin; ndriçim dhe mbikëqyrje më të mirë të hapësirave publike; si dhe krijimin e kanaleve të shpejta për raportimin e kërcënimeve, konflikteve dhe rasteve të mbajtjes së armëve të ftohta nga të miturit.
Po ashtu, nevojitet bashkëpunim më i ngushtë ndërmjet prindërve, shkollave, policisë, shërbimeve sociale dhe institucioneve të drejtësisë. Në rastet kur ekzistojnë sinjale të përsëritura të agresivitetit, kërcënimeve apo përfshirjes në konflikte, duhet të ketë mekanizma të hershëm të ndërhyrjes dhe referimit të fëmijës te profesionistët përkatës.
Qasja e të miturve në mjete të rrezikshme dhe armë të ftohta.
Duhet të forcohet kontrolli mbi shitjen dhe furnizimin e të miturve me mjete që mund të përdoren për të shkaktuar lëndime serioze, ndërsa prindërit duhet të jenë më të vëmendshëm ndaj asaj që fëmijët mbajnë me vete dhe rrethit në të cilin ata shoqërohen.
Kjo tragjedi duhet të jetë një alarm për prindërit, shkollat dhe institucionet. Dhuna nuk shfaqet gjithmonë papritur. Ajo mund të paraprihet nga konflikte të përsëritura, bullizëm, kërcënime, agresivitet, përjashtim social ose mungesë e aftësive për menaxhimin e zemërimit dhe konflikteve.
Një fëmijë nuk duhet të humbasë jetën që shoqëria të kuptojë se një problem ekziston.
Në Prinderimi.com besojmë se siguria e fëmijëve është përgjegjësi e përbashkët. Kjo tragjedi kërkon hetim të plotë dhe drejtësi, por gjithashtu kërkon reflektim serioz: çfarë mund të bëjmë sot që një tjetër familje të mos përballet me një dhimbje të tillë nesër?
Prinderimi.com
