Melatonina
Melatonina është një hormon natyror që prodhohet nga truri dhe luan një rol të rëndësishëm në mbështetjen e ritmit cirkadian të trupit dhe në nxitjen e një gjumi të qetë.
Nivelet e melatoninës rriten gjatë natës, duke ju bërë të ndiheni të përgjumur, dhe bien në agim, duke bërë që të zgjoheni, prandaj ndonjëherë quhet “hormoni i errësirës”.
Mënyra më e mirë për të siguruar prodhimin optimal të melatoninës është që fëmija juaj të flejë në një mjedis sa më të errët të jetë e mundur. Përdorni perde të rënda me astar dhe/ose perdet e errëta (blackout blinds) për të bllokuar dritën e jashtme.
Në periudhën para gjumit, zbehni dritat dhe shmangni kohën e ekranit. Prodhimi i melatoninës ndërpritet nga aktivitetet me ekran, për shembull shikimi i televizorit ose loja në kompjuter. Drita nga ekranet do të ndalojë prodhimin e melatoninës në mënyrë efektive, prandaj është më mirë të shmangni këto aktivitete në orën e fundit para gjumit.
Receptat e melatoninës
Melatonina mund të përshkruhet dhe ndonjëherë përdoret në menaxhimin e problemeve të gjumit te fëmijët. Fëmijët me nevoja të veçanta dhe aftësi të kufizuara janë më të rrezikuar të kenë probleme me gjumin dhe më shpesh u përshkruhet ky medikament.
Para se të jepet një recetë, është e rëndësishme të provoni metodat jo-farmakologjike të ndërhyrjes për gjumin. Kjo përfshin vlerësimin e problemeve të gjumit nga një specialist, i cili më pas do të punojë me familjen për të zhvilluar një program ndërhyrjeje. Kjo mund të përfshijë ndryshime në rutinën e gjumit, oraret e gjumit/zgjimit dhe mjedisin e dhomës së gjumit, ndër të tjera. Nëse një program ndërhyrjeje i gjumit bazuar në sjellje nuk është i suksesshëm, mund të diskutohet përdorimi i melatoninës. Nëse kërkohet një recetë e melatoninës, higjiena e mirë e gjumit duhet të ndiqet gjithsesi, pasi qëllimi është të ndalohet medikamenti sapo të arrihet një rutinë e mirë.
Efektet anësore të melatoninës
Melatonina zakonisht tolerohet mirë nga të rinjtë; efektet anësore më të zakonshme të raportuara janë dhimbjet e kokës, përgjumja, të përzierat dhe marramendja. Më rrallë, ajo mund të rrisë rrahjet e zemrës dhe mund të rrisë krizat epileptike te fëmijët me epilepsi. Nëse jeni të shqetësuar për efektet anësore, duhet ta ngrehni këtë shqetësim me një profesionist mjekësor. Temperatura e fëmijëve zakonisht bie pas marrjes së melatoninës; ky është një reagim tipik.
Lista e ushqimeve që përmbajnë melatoninë
- Vishnjat – Qershitë e athëta (Tart Cherries),
- Bajamet dhe fëstekët,
- Qumështi dhe produktet e qumështit (jogurt, djathë),
- Vezët,
- Peshku (sidomos peshku i yndyrshëm si Salmoni),
- Tërshëra (oats) dhe orizi,
- Bananet,
- Domatet, perimet me ngjyrë të gjelbër, misri,
Burimi: Fondacioni Britanik për Gjumin dhe burime të tjera
Solli për ju: Prinderimi.com
