Fëmijët me aftësi të kufizuara duhet të konsiderohen si të gjithë fëmijët e tjerë!
Të veçantë duhet të jenë prindërit ose kujdestarët e tyre.
Fëmijët me nevoja të veçanta janë fëmijë te cilët kanë dëmtime të llojit dhe shkallës së ndryshme dhe për këtë ata kanë nevojë për përkujdesje të shtuar.
Çfarë duhet të bëj nëse mendoj se fëmija im është me nevoja të veçanta?
Duhet të paraqiteni te psikologu, i cili pastaj do ta konstatojë gjendjen dhe shkallën e dëmtimit. Psikologu pastaj do t’ju drejtojë tek shërbimet tjera për të cilat ka nevojë fëmija juaj.
Çfarë duhet te ndërmarr pasi qe gjendja te jete konstatuar?
Sa me herët që e pranoni gjendjen reale, aq më shumë do t’i ndihmoni fëmijës që të tejkalojë vështirësinë, ta zvogëlojë ose eliminojë fare.
Duhet të merrni informata të detajuara nga profesionistët e ndryshëm, të mësoni, të këshilloheni lidhur me llojin dhe shkallën e dëmtimit që ka fëmija juaj.
Bashkëpunoni me prindër të tjerë, anëtarësohuni në shoqata të ndryshme për fëmijë dhe prindër me nevoja të veçanta.
Bashkëpunoni me institucionet si:
• Sektori i shëndetësisë – rehabilitimi,
• Sektori i mirëqenies sociale,
• Sektori i arsimit – institucionet parashkollore dhe shkolla
Bisedoni haptas për situatën tuaj, kërkoni mendime nga të tjerët dhe merrni vendime të matura për fëmijët tuaj.
Pse dhe si duhet të bëhet vlerësimi i fëmijëve me nevoja të veçanta?
Me vlerësim nënkuptojmë procedurën e përcaktimit të shkallës dhe llojit të dëmtimit, si dhe nevojat për trajtim dhe edukim.
Pas vlerësimit, kujdesuni në mënyrë të veçantë për dokumentet që i keni grumbulluar nga vizitat, testimet, përvojat tuaja të deritanishme me fëmijën.
Mundësisht mbani shënime për datat e rëndësishme lidhur me zhvillimin e fëmijës tuaj.
Me çfarë vështirësish ndeshen prindërit?
• me nivelin e ulët të vetëdijes në rrethin ku jetojnë;
• me informim joadekuat rreth mbrojtjes së të drejtave të fëmijëve;
• me mospërfshirjen e fëmijëve në institucione parashkollore;
• me shoqata të ndryshme të cilat nuk kanë qasje të lehtë për prindërit dhe me mungesë të transparencës mbi aktivitetet në raste të veçanta;
• me pamundësinë për të marrë ndihmë në një institucion të vetëm ku ofrohen te gjitha shërbimet;
• me mospërkrahje institucionale për përmirësimin e kualitetit te jetës për familje me fëmijë me nevoja të veçanta.
Çfarë duhet të bëj për të ndihmuar fëmijën tim?
Të përpiqeni të krijoni një ambient familjar sa më të shëndoshë. Çdo fëmijë për t’u zhvilluar kërkon të jetë i pranuar dhe i dashur nga rrethi i tij. Kjo posaçërisht vlen për fëmijët me nevoja të veçanta.
Fëmija ka nevojë për dashurinë tuaj dhe të gjithë familjes suaj. Fëmija do të rritet i lumtur nëse anëtaret e familjes janë në harmoni mes veti. Detyra më e rëndësishme për familjen është të forcohet lidhja mes prindërve dhe që të dy ta marrin përgjegjësinë e plotë për kujdesin për fëmijët.
Të bëheni aktivist i luftimit të stigmes (keqinterpretimeve) dhe mundësisë për sa më shumë informacione rreth problemit të fëmijës tuaj.
Gjithashtu është e nevojshme që të gjithëve në familje të ngushtë dhe të gjerë, shokëve në mënyrë të thjeshtë t’u shpjegoni për dëmtimin, duke e cekur se ju do të bëni aq sa është e mundur që fëmija ta mund në masë të madhe vështirësinë që ka. Nuk keni pse te ndiheni keq.
Sjellja natyrale dhe normale e prindërve me fëmijën me nevoja të veçanta është fuqia me e madhe që ka shoqëria jonë, ashtu që do t’iu ndihmoni edhe të tjerëve që kanë fëmijë të tillë, nevojave të tyre dhe në këtë mënyrë të tejkalohen edhe paragjykimet.
