Për më tepër, unë mendoj se pasoja më negative që vjen si rezultat i shpërqendrimit, është pengesa që krijohet për një marrëdhënie të mirë, të hapur dhe të ngushtë me fëmijën tuaj.
Një ndër arsyet që ju prireni t’i trajtoni nëpërmjet shpërqendrimit apo mohimit ndjenjat e tyre, është fakti se i shikoni situatat sipas këndvështrimit tuaj, jo sipas këndvështrimit të tyre.
Për shembull, nëse si një i rritur, ju jeni të vetëdijshëm që nuk mund të shkoni në punë me mamanë tuaj dhe kjo për ju nuk është fundi i botës, për një fëmijë të vogël nuk është kështu. Për atë duket si të ishte fundi i botës. Ne, gjithashtu, mund të ndihemi fajtorë për shkak se ndihemi përgjegjës për stresin që ata përje tojnë, kështu që është më e përshtatshme për ne që t’ia mohojmë ato ndjenja.
Pra, çfarë duhet të bëni nëse njëri nga prindërit duhet të shkojë në punë dhe fëmija i vogël është i pangushëllueshëm për këtë fakt? Nëse ju jeni prindi që i duhet të largohet, atëherë jini të vendosur kur e bëni. Fëmija juaj ka më shumë gjasa që të ndihet më i sigurt kur ju jeni të qetë, të vendosur dhe optimist.
Është e rëndësishme që të mos largoheni vjedhurazi, por ta bëni veprimin duke u dhënë atyre vëmendje dhe dashamirësi. Nëse ju alarmoheni ndërsa largoheni dhe e teproni me reagimin tuaj, nuk do ta ndihmoni fëmijën tuaj. Nëse ju e shpërfillni dhimbjen që ata ndiejnë, atëherë nuk do të jeni për ta pasqyra që ata kanë nevojë. Pranojeni atë që ata ndiejnë. Dhurojuni atyre një përqafim dhe u thoni diçka të tillë si: “E kuptoj se nuk dëshiron që unë të shkoj në punë, por pasdite do të jem në shtëpi.”
Nëse ju jeni prindi apo kujdestari që qëndroni me fëmijën, ajo që duhet të bëni është të harmonizoheni me emocionet e tyre. Kjo nënkupton që t’i pranoni ndjenjat e tyre, për shembull duke u thënë: “Ti nuk dëshiron që mami të largohet. E kuptoj që ndi- hesh i trishtuar!” Në të vërtetë, nëse e mendoni, është tërësisht e kuptueshme që të ndihesh i trishtuar kur njeriu që doni largohet nga ju. Ju mund t’i tregoni se kur do të kthehet e ëma: “Mami do të kthehet në shtëpi pasdite.” Mos gënjeni për kohëzgjatjen e kthimit të dikujt. Fëmija mund të mësojë të krijojë një ide të shtrembëruar të kohës ose thjesht nuk do t’ju besojë më kur t’ia thoni herën tjetër.
Përgatiti: Prinderimi.com
Autor: Philippa Perry, “Libri që do të dëshironit të lexonin prindërit tuaj”
