Në një studim të publikuar së fundmi në Health Psychology, studiuesit hulumtuan marrëdhënien komplekse midis stigmës rreth peshës, vetë-perceptimit në raport me peshën dhe vigjilencës në një grup të ndryshëm prej mbi një mijë të rriturish amerikanë. Qëllimi ishte të kuptonim se si këta faktorë kryqëzohen dhe ndikojnë në zakonet tona të të ngrënit.
Studiuesit shqyrtuan më në detaje se si stigma e peshës, e cila përfshin trajtimin e dikujt ndryshe për shkak të peshës së tyre trupore, lidhet me mendimet dhe sjelljet tona. Ata hulumtuan nëse këto përvoja kontribuojnë në shprehi jo-përshtatëse të të ngrënit, si të ngrënit emocional, dieta strikte dhe ngrënia e tepërt.
Si rezultat, studimi pohoi se përjetimi i stigmës së peshës ndikon drejtpërdrejt në zakonet tona të të ngrënit. Ata që përballen me stigmën kanë më shumë gjasa të përdorin sjellje jo-përshtatëse të të ngrënit.
Stigma e peshës gjithashtu ndikon në mënyrë të tërthortë në modelet tona të të ngrënit përmes vigjilencës ose të qenit vazhdimisht vigjilent për gjykim. Kjo vigjilencë e shtuar mund të çojë në zakone jo të shëndetshme të të ngrënit.
Përveç kësaj, studimi nënvizoi poashtu se nëse individët tashmë kanë mendime negative për peshën e tyre, ndikimi i vigjilencës në zakonet e tyre të të ngrënit është edhe më i theksuar.
Si përfundim, ky studim thekson se kur individët përballen me diskriminim për shkak të peshës së tyre, kjo shpesh çon në sjellje të dëmshme të të ngrënit. Kjo është veçanërisht e vërtetë kur ata janë vazhdimisht të shqetësuar për gjykimet që mund të vijnë në drejtim të tyre. Për ata që tashmë po përballen me vetë-perceptime negative në lidhje me peshën e tyre, ndikimi është edhe më i theksuar.
Rrjedhimisht, studimi në fjalë potencon nevojën urgjente për eksplorim të mëtejshëm të vigjilencës në kontekstin e stigmës së peshës, si dhe kërkon një qasje më empatike dhe gjithëpërfshirëse, duke hedhur dritë mbi efektet e dëmshme të stigmës së peshës dhe duke bërë thirrje për përpjekje drejt një shoqërie më të pranueshme.
Citimi i plotë: Wetzel, K. E., & Himmelstein, M. S. (2023). Constant vigilance: The impact of weight stigma, vigilance, and internalization on maladaptive eating behaviors. Health Psychology, 42(10), 712–722. https://doi.org/10.1037/hea0001324
