Të prezantosh veten nuk është vetëm të thuash emrin dhe moshën. Kjo është një aftësi sociale që i ndihmon fëmijët të ndihen më të sigurt, të krijojnë marrëdhënie me të tjerët dhe të shprehin më mirë personalitetin e tyre. Që nga takimet me njerëz të rinj, dita e parë në shkollë, aktivitetet jashtëshkollore apo situatat e përditshme, aftësia për të komunikuar me siguri është një dhunti që ndërtohet që në fëmijëri.
Shumë fëmijë ndihen të turpëruar ose të pasigurt kur duhet të flasin para të tjerëve. Kjo është krejt normale. Qëllimi i prindërve nuk është t’i detyrojnë fëmijët të jenë gjithmonë të hapur dhe ekstrovertë, por t’i ndihmojnë ata të zhvillojnë gradualisht besimin për të komunikuar.
Filloni me shembullin tuaj
Fëmijët mësojnë shumë duke vëzhguar prindërit e tyre. Në situata të zakonshme, tregojuni atyre si bëhet një prezantim i thjeshtë.
Për shembull:
“Përshëndetje, unë jam Arta. Jam 8 vjeçe dhe më pëlqen të lexoj libra dhe të vizatoj.”
Kur fëmija dëgjon mënyrën se si prezantohemi me të tjerët, ai mëson strukturën dhe tonin e duhur të komunikimit.
Mësojini hapat bazë të një prezantimi
Një prezantim i mirë për fëmijët mund të përfshijë disa elemente të thjeshta:
- Përshëndetja: “Përshëndetje” ose “Mirëdita”.
- Emri: “Unë quhem…”
- Një informacion të shkurtër për veten: “Jam në klasën…”, “Më pëlqen…”, “Hobi im është…”
- Një pyetje për personin tjetër: “Po ti, si quhesh?”
Kjo i ndihmon fëmijët të kuptojnë se komunikimi është një shkëmbim, jo vetëm një fjalim.
Praktikoni përmes lojës
Fëmijët mësojnë më lehtë kur aktiviteti është argëtues. Prindërit mund të krijojnë situata loje në shtëpi.
Për shembull:
- Bëni sikur jeni në ditën e parë të shkollës.
- Luani rolin e një personi të ri që takon fëmijën.
- Kërkojini fëmijës të prezantohet para familjarëve.
Mos e korrigjoni çdo detaj. Fillimisht vlerësoni përpjekjen dhe gradualisht ndihmojeni të përmirësohet.
Ndihmojini fëmijët të flasin për veten me pozitivitet
Disa fëmijë e kanë të vështirë të tregojnë gjëra për veten sepse nuk janë të sigurt për vlerat dhe aftësitë e tyre. Prindërit mund t’i ndihmojnë duke bërë pyetje si:
-Cila është diçka që të pëlqen te vetja?
-Çfarë të bën të ndihesh krenar?
-Cilat janë gjërat që të pëlqen t’i mësosh?
Kjo i ndihmon fëmijët të krijojnë një njohje më të mirë të vetes.
Respektoni temperamentin e fëmijës
Jo çdo fëmijë ndihet rehat duke folur menjëherë me njerëz të rinj. Disa fëmijë kanë nevojë për më shumë kohë për t’u hapur. Shmangni krahasimet si: “Shiko sa mirë flet shoku yt” ose “Pse je kaq i turpshëm?”
Në vend të kësaj, jepini siguri:
“E di që mund të jetë pak e vështirë në fillim, por ti mund ta provosh.”
Aftësia për ta prezantuar veten është një investim në vetëbesimin e fëmijës. Me mbështetje, praktikë dhe inkurajim, fëmijët mësojnë jo vetëm të flasin para të tjerëve, por edhe të njohin dhe të vlerësojnë më mirë veten.
