Te shtëpia e shëndetit mendor në komunën e Deçanit, marrin ndihmë personat me aftësi të kufizuara mendore.
Megjithatë disa pacientë, dyshohet se u mashtruan nga udhëheqësja e kësaj qendre së bashku me djalin e saj.
Drejtoresha e kësaj qendre është arrestuar një ditë më herët së bashku më djalin e saj, nën dyshimet se kanë keqpërdorur disa kartela bankare të pacientëve.
Kurse këtë të shtunën Policia e Kosovës dha detaje shtesë.
“Më 17.01.2025 janë arrestuar një mashkull dhe një femër nën dyshimin se të në bashkëveprim me qëllim të përfitimit të dobisë pasurore për vete, duke u keqpërdorur kartelat bankare personave me aftësi të kufizuara (në shtëpinë e komunitetit), kanë bërë tërheqjen e mjete pensioneve”, deklaroi Policia e Kosovës.
Ndërkaq, nga Prokuroria Themelore e Pejës thanë se hetimet për këtë rast kanë filluar qysh nga viti i kaluar.
”Nga muaji korrik i vitit të kaluar janë zhvilluar hetime intensive, përmes teknikave të veçanta hetimore, ku kemi grumbulluar prova të mjaftueshme për të cilat do të shërbejnë në këtë procedurë penale dhe do dëshmohet fajësia e personave të pandehur”, ka thënë Shkodran Nikqi, zëdhënës në Prokurorinë Themelore në Pejë.
Për këtë rast Policia me urdhër të Prokurorisë ka kryer bastisje në tri lokacione ku janë gjetur armë të cilat janë sekuestruar.
Prokurori i rastit brenda afatit ligjor do të parashtroj kërkesë për sigurimin e prezencës së të pandehurve në procedurë penale dhe do kërkoj pezullimin nga puna./Dukagjini/
