Shumë prindër janë të brengosur se si të largojnë vëmendjen e fëmijës nga televizori, lojërat elektronike dhe telefoni mobil, për të zvogëluar ndikimin e tyre negativ në mendjen dhe kohën e tyre. Prandaj rrëfimi i tregimeve është një mënyrë efektive për të realizuar këtë objektiv.
Komunitetet muslimane kanë qenë analfabete me shekuj dhe edukimin e tyre e kanë marrë vetëm nëpërmjet tregimeve. Në rrëfimet popullore ata gjenin pothuajse të vetmin burim të informimit për ngjarjet e historisë dhe përcjelljes së vlerave fisnike dhe morale. Në disa vende arabe në një kohë njerëzit mblidheshin përreth një rrëfyesi tregimesh për kohë të gjatë, i cili u rrëfente tregimin e Hasan banditit ose Antarah ibn Sheddadit.
Deri sot më kujtohet se si mblidheshim rreth nënës për të dëgjuar tregimin e emigrimit të Beni Hilalit nga Arabia në Afrikën e Veriut, ose heroizmat e Ebu Zejd el-Hilalit, për dredhitë dhe hilet e tij ndaj armikut. Më kujtohet vetja i ulur qetësisht dhe asnjëherë nuk përfillnim urdhëratë e saj për të shkuar në shtrat pa e dëgjuar një tregim prej saj. Nganjëherë ajo kotej duke na treguar tregime, mirëpo ne ia nxirrnim gjumin për të dëgjuar më tepër prej saj, ndonëse duhej t’ia kujtonim se ku kishte mbetur. Kur flasim për dobitë e rrëfimit të tregimeve për fëmijët, mund t’i përmendim katër synime që arrihen nëpërmjet tij:
– Argëtimi i fëmijës, mbushja e kohës së tij të lirë.
Përforcimi i lidhjes midis të gjithë anëtarëve të familjes dhe ndarja e kohës për takime të përbashkëta.
– Zgjerimi i kapacitetit intelektual dhe emocional të fëmijës dhe pasurimi i përvojës së tij
Të udhëzuarit e fëmijës dhe mbjellja e vlerave, parimeve dhe koncepteve superiore islame.
Megjithatë, tri synimet e fundit nuk mund të realizohen pa e siguruar synimin e parë, sepse nëse fëmija nuk e pëlqen tregimin ai nuk do të dëgjojë dhe nuk do të përgjigjet. Nuk është aq e vështirë për prindërit të dinë nëse tregimet e tyre dhe mënyrat si i tregojnë janë atraktive ajo jo.
Nëse e sheh se fëmija të kushton tërë vëmendjen, nuk e shpërqendron asgjë, kjo nënkupton se ai e pëlqen atë që i tregohet dhe nëse ai të kërkon t’ia përsërisësh një tregim të ri ose të vjetër, kjo nënkupton se stili yt i tregimit e tërheq. I këshilloj prindërit t’i mësojnë përmendësh shumë tregime të mahnitshme, të cilat gjenden në libra të ndryshëm dhe në internet, që gjithmonë ti befasojnë fëmijët me gjëra të freskëta dhe interesante.
Përgatiti: Prinderimi.com
Autor: Dr. Abdulkerim Bekkar, ”Fëmija lexon”
