Një tendencë e re dhe e rrezikshme e mediave sociale, e njohur si sfida “Superman,” po shkakton shqetësim të thellë mes mjekëve dhe prindërve, pasi raportet mbi lëndimet e rënda mes fëmijëve dhe adoleshentëve vazhdojnë të shtohen, njofton Prinderimi.com
Kjo sfidë përfshin ngritjen dhe hedhjen në ajër të një individi nga bashkëmoshatarët e tij, me qëllim që ai të imitojë lëvizjet ikonike të një superheroi. Megjithatë, pasojat shpesh janë fatale për pjesëmarrësit e sfidës.
Incidentet alarmuese dhe dëmet shëndetësore
Të paktën 19 fëmijë dhe të rinj kanë përfunduar në spital si pasojë e pjesëmarrjes në këtë sfidë, me lëndime që përfshijnë fraktura, mavijosje, tronditje cerebrale dhe raste serioze të humbjes së ndjenjave. Një prej viktimave, një vajzë 12-vjeçare, rrëfen se si sfida përfundoi për të me humbjen e vetëdijes. “Nuk mbaj mend asgjë nga koha kur rashë deri sa u zgjova në spital,” tha ajo, ndërsa mjekët konfirmuan se ajo kishte pësuar një tronditje të rëndë.
Nëna e saj tregoi se, përkundër masave për të kufizuar ekspozimin ndaj përmbajtjes së rrezikshme, vajza e saj u ndikua nga bashkëmoshatarët. “Ishte e tmerrshme. Nuk e kuptova si ndodhi, pasi ajo as nuk përdor TikTok,” tha ajo.
Rrjeti i Prindërve të Kosovës ka reaguar menjëherë pas marrjes së informacioneve që në shumë shkolla të Kosovës është shpërndarë ky trend. Lexo reagimin e plotë:
Paralajmërimi i mjekëve
Mjekët bëjnë thirrje të forta për ndërgjegjësim. Dr. Dana Zinger, një mjeke në një qendër të specializuar për emergjenca pediatrike, deklaroi: “Vetëm gjatë kësaj jave kemi pranuar disa fëmijë me dëmtime të shkaktuara nga sfida ‘Superman.’ Fatkeqësisht, disa prej këtyre rasteve kanë përfunduar me komplikacione serioze shëndetësore.”
Mesazhi për prindërit dhe fëmijët
Specialistët këshillojnë prindërit të jenë më të vëmendshëm ndaj aktiviteteve të fëmijëve të tyre dhe të edukojnë ata për rreziqet e trendeve të rrezikshme të internetit. Gjithashtu, u bëhet thirrje adoleshentëve që të shmangin imitime të tilla, pasi dëmet e shkaktuara mund të jenë të përhershme.
Sfida “Superman” është vetëm një shembull nga fenomenet e shumta që vënë në rrezik sigurinë e fëmijëve dhe të rinjve në epokën e mediave sociale. Për të parandaluar tragjeditë e mundshme, është jetike që shoqëria të trajtojë këtë problem në nivel individual dhe kolektiv.
© Prinderimi.com | Të gjitha të drejtat e rezervuara
*Klikoni KËTU për t´u bërë pjesë e kanalit zyrtar të Klan Kosovës në Viber.
