TikTok, platforma kineze me mbi 175 milionë përdorues në Evropë, ofron një gamë të gjerë përmbajtjesh, duke i adresuar një audiencë me interesa dhe synime të ndryshme. Megjithatë, kjo platformë mbetet pjesërisht në një zonë të kuqe kur bëhet fjalë për sfidat (të ashtuquajturat challenges), të cilat shpesh shndërrohen në fenomene virale, por ndonjëherë përfshijnë edhe veprime të rrezikshme.
Një shembull shqetësues është “Sfida e Supermenit” (ang. ”Superman Challenge”), një trend që ka shkaktuar pasoja të rënda shëndetësore. Në Rumani, rreth 20 fëmijë kanë përfunduar në spital për shkak të kësaj sfide, duke përfshirë raste me fraktura serioze. Por çfarë përfshin kjo sfidë? Fëmijët dhe të rinjtë imitojnë “fluturimin” e Supermenit duke u hedhur përpara me një krah të shtrirë dhe një grusht të shtrënguar. Fillimisht, ata mbështeten në krahët e shokëve, të cilët më pas i largojnë krahët duke shkaktuar rënien e personit në tokë. Pasojat, siç kanë treguar raportimet, mund të jenë serioze.
Ky trend nuk është i kufizuar vetëm në një rajon apo grupmoshë specifike. Hashtagu #superman ka mbi 2 milionë postime në TikTok, duke dëshmuar përhapjen masive të këtij fenomeni. Për më tepër, variante të tjera të këtij trendi, si #supermanchallenge, kanë gjithashtu një ndjekje të konsiderueshme. Një nga rastet më të njohura është i një vajze me emrin Juana, e cila theu krahun gjatë kësaj sfide dhe dokumentoi ngjarjen në TikTok. Videoja e saj ka arritur mbi 8 milionë shikime.
Një tjetër përdoruese, Lily, publikoi një video duke treguar akullin në ballë dhe duke shkruar: “Trendi ka shkuar keq…”. Për fat të keq, ky trend ka mbërritur edhe në vende të tjera, përfshirë Italinë, Rumaninë, ku video të ngjashme janë shpërndarë gjerësisht. Shumë nga pjesëmarrësit janë adoleshentë të moshës 13 deri në 16 vjeç, por ka edhe raste ku përfshihen fëmijë më të vegjël. Disa video kanë arritur shifra të jashtëzakonshme shikimesh, duke përfshirë një që numëron mbi 29 milionë shikime. Edhe në Kosovë ka video të tilla të publikuara, por pas reagimit të Rrjetit të Prindërve të Kosovës, disa sosh janë fshirë.
Variacionet e sfidës dhe përhapja ndërkombëtare
Ndërsa muzika në sfond është zakonisht e njëjtë (“Watch Me”), modalitetet e luajtjes ndryshojnë. Në disa raste, pjesëmarrësit përfshijnë edhe salto ose kërcime më komplekse, që përfundojnë gjithmonë me një rënie të dhunshme në tokë. Përveç pasojave fizike, promovimi i këtyre sfidave ngre pyetje serioze mbi përgjegjësinë e platformave dhe ndikimin e tyre tek audienca e re.
A do të marrë masa TikTok?
Në një botë ku mediat sociale kanë fuqinë për të formësuar sjelljet e të rinjve, përgjegjësia për të mbrojtur përdoruesit – veçanërisht ata më të rinjtë – është jetike. Ndërhyrja e TikTok për të ndaluar këto video të rrezikshme është jo vetëm e dëshirueshme, por e domosdoshme për të parandaluar dëme të mëtejshme dhe për të garantuar një mjedis më të sigurt në platformë.
Përfundimisht, ndërgjegjësimi i prindërve, mësuesve dhe shoqërisë në përgjithësi është thelbësor për të parandaluar përsëritjen e fenomeneve të tilla, që, përkundër dukjes argëtuese, fshehin rreziqe të mëdha për shëndetin dhe mirëqenien e fëmijëve.
© Prinderimi.com | Të gjitha të drejtat e rezervuara.
*Klikoni KËTU për t´u bërë pjesë e kanalit zyrtar të Rrjetit të Prindërve të Kosovës në Viber.
