Çka janë nevojat zhvillimore?
Këto lloj nevojash nuk shfaqen nga lindja, por shfaqen “natyrshëm” me rritjen e fëmijës, kur ky i fundit arrin në periudha të caktuara të jetës. Kur ato nuk përmbushen, kjo gjë sërish krijon tendosje emocionale dhe e shtyn personin në përpjekje për t’i përmbushur ato.
Për shembull, kur arrijnë në moshën rreth 4 vjeç, fëmijët duan të bëhen pjesë e grupeve shoqërore me moshatarët e tyre. Kjo është një nevojë “e natyrshme” e fëmijës, e cila nuk është e pranishme në lindje, por shfaqet si një lloj “zgjimi nevoje” rreth moshës 4 vjeçare. Në këtë mënyrë fëmija do ta bartë gradualisht veten në rrugëtimin për t’u rritur. Po të vihet re, në këtë moshë fëmijët fillojnë të shprehin mërzi nga të qëndruarit në shtëpi dhe të kërkojnë të lozin jashtë e të thonë “Dua edhe unë një vëlla!”. Të tilla fjalë dhe sjellje sinjalizojnë zgjimin e një nevoje të re tek fëmija.
Lexo poashtu: https://prinderimi.com/trajnimi-i-femijes-per-ti-artikuluar-nevojat-e-tij/
Po ashtu, fëmijët rreth moshës 4 vjeç janë tejet kureshtarë, përpiqen t’i njohin sendet dhe i pyesin prindërit pa pushim “Ç’është kjo?”. Të tilla pyetje janë “nevojë zhvillimore” e fëmijës dhe përfshijnë një periudhë të caktuar të jetës. Në këtë periudhë, nëse u jepet përgjigje pyetjeve të fëmijës, ky i fundit e vazhdon zhvillimin e vet. Nëse nuk gjen përgjigje për këto pyetje që lindin nga një kureshtje që as ai nuk e di nga i vjen, fëmija nis të grindet dhe të reagojë ndaj prindit…
Nëse “nevojat zhvillimore” që tek çdo fëmijë shfaqen thuajse në të njëjtën moshë, dalin në pah më herët apo më vonë, kjo tregon një problem. Për shembull, nëse një fëmijë që normalisht duhet t’i zgjohet nevoja për shoqërim në moshën 4 vjeçare, është bërë 7 vjeç dhe akoma nuk dëshiron të komunikojë me njerëzit përreth e përpiqet të qëndrojë vazhdimisht vetëm me nënën, ky është problem dhe duhet zgjidhur. Ose e kundërta, nëse fëmija dëshiron të ndahet nga nëna pa e përjetuar procesin e lidhjes me të që fillon nga mosha 2 vjeç dhe kërkon ta kalojë natën në të tjera vende pa e ndjerë nevojën për nënën, edhe kjo përbën problem.
Përgatiti: Prinderimi.com
Autor: Dr. Adem Güneş, “Si veprojnë fëmijët dhe pse?”
