Gushti lidhet me rritjen e vëmendjes ndaj sigurisë në trafik dhe, me afrimin e fillimit të vitit të ri shkollor, rrugët bëhen sërish më të ngarkuara me fëmijë, prindër dhe automjete. Për familjet, siguria në makinë nuk duhet të jetë një çështje që kujtohet vetëm gjatë udhëtimeve të gjata. Një nga vendimet më të rëndësishme është mënyra se si vendoset dhe përdoret ulësja e fëmijës.
Një praktikë që ende mund të ngrejë pyetje te prindërit është udhëtimi me shpinë nga drejtimi i lëvizjes (rear-facing). Akademia Amerikane e Pediatrisë rekomandon që foshnjat të udhëtojnë në këtë pozicion që nga udhëtimi i parë dhe që foshnjat e vogla dhe fëmijët e vegjël të vazhdojnë kështu për aq kohë sa lejojnë kufijtë e peshës dhe gjatësisë së përcaktuar nga prodhuesi i ulëses. Shumë ulëse të konvertueshme lejojnë përdorimin rear-facing për dy vjet ose edhe më gjatë.
Pse është më i sigurt ky pozicion?
Fëmijët e vegjël kanë kokë relativisht më të madhe, qafë dhe shtyllë kurrizore ende në zhvillim dhe ligamente më të lirshme. Në një përplasje ose frenim të menjëhershëm, një ulëse e vendosur rear-facing e mbështet më mirë shpinën, kokën dhe qafën e fëmijës dhe ndihmon në shpërndarjen e forcës së goditjes.
Dëshmitë shkencore e mbështesin përdorimin e pozicionit me fytyrë nga pjesa e pasme e automjetit për fëmijët e vegjël. Një studim i publikuar në revistën shkencore “Injury Prevention” analizoi të dhënat e aksidenteve rrugore që përfshinin fëmijë 0–4 vjeç dhe zbuloi se, pas përshtatjes për faktorë të tjerë, fëmijët e vendosur në ulëse me fytyrë nga pjesa e pasme kishin 9% më pak gjasa të pësonin lëndime krahasuar me ata në ulëse me fytyrë në drejtim të lëvizjes.
Çfarë duhet të bëjnë prindërit?
1. Mos u nxitoni ta ktheni ulësen përpara.
Mos u bazoni vetëm te mosha. Kontrolloni kufirin maksimal të peshës dhe gjatësisë në manualin e ulëses. Kur fëmija e tejkalon këtë kufi, kaloni në një ulëse forward-facing me sistemin e vet të rripit, sipas udhëzimeve të prodhuesit.
2. Vendoseni ulësen në pjesën e pasme të automjetit.
Pjesa e pasme konsiderohet vendi më i sigurt për fëmijët. Një ulëse rear-facing nuk duhet të vendoset përpara një airbag-u aktiv, sepse hapja e tij mund të shkaktojë lëndime serioze.
3. Kontrolloni rripat para çdo udhëtimi.
Rripat duhet të jenë të përshtatur mirë me trupin e fëmijës dhe të përdoren sipas manualit. Po ashtu, ulësja duhet të jetë e fiksuar fort në automjet dhe në këndin e përcaktuar nga prodhuesi.
4. Mos u shqetësoni vetëm sepse këmbët e fëmijës prekin sediljen.
Kjo është një nga shqetësimet e zakonshme të prindërve. Fëmijët janë fleksibël dhe prekja e këmbëve me pjesën e pasme të sediljes nuk do të thotë automatikisht se është koha për ta kthyer ulësen përpara.
Rear Facing apo Forward Facing?
Në përgjithësi, foshnjat duhet të udhëtojnë në pozicionin rear-facing që nga udhëtimi i parë dhe të qëndrojnë në këtë pozicion sa më gjatë të jetë e mundur, derisa të arrijnë kufirin maksimal të peshës ose gjatësisë të përcaktuar nga prodhuesi i ulëses. Shumë ekspertë rekomandojnë që fëmijët të qëndrojnë rear-facing të paktën deri në moshën 2 vjeç, ndërsa disa ulëse lejojnë përdorimin e këtij pozicioni edhe përtej kësaj moshe. Vetëm pasi fëmija ta tejkalojë kufirin e ulëses për rear-facing (në drejtim të kundërt të lëvizjes) duhet të kalojë në pozicionin forward-facing (Në drejtim të lëvizjes), gjithmonë duke respektuar kufijtë e peshës dhe gjatësisë së ulëses.
Në Kosovë, ku siguria rrugore mbetet një çështje e rëndësishme gjatë muajve të verës, shtatori mbetet si një moment të mirë për të kontrolluar jo vetëm shpejtësinë dhe rripat e sigurimit, por edhe mënyrën se si udhëtojnë fëmijët, për shkak të shtimit të udhëtarëve nga fillimi i shkollës. Policia e Kosovës që nga gushti, i cili ishte muaji i sigurisë në trafik, ka intensifikuar kontrollet verore ndaj shkeljeve që rrezikojnë pjesëmarrësit në trafik, duke përfshirë shpejtësinë, përdorimin e telefonit dhe mosrespektimin e rregullave të sigurisë.
Në fund, siguria e fëmijës nuk fillon kur ndodh një aksident. Ajo fillon në momentin kur ndizni makinën. Një ulëse e përshtatshme, e instaluar siç duhet dhe e përdorur në çdo udhëtim është një nga mënyrat më konkrete që prindi mund të zgjedhë për ta mbrojtur fëmijën.
Prinderimi.com
