Mediat, përfshirë televizionin, filmat, reklamat dhe rrjetet sociale, shpesh paraqesin modele sjelljesh dhe vlerash. Prindërit duhet të jenë të vetëdijshëm për këtë, sepse fëmijët mund të marrin shembuj dhe të ndikohen nga ato që shohin dhe dëgjojnë.
Media ndikon në formimin e perceptimeve të fëmijëve rreth gjinisë, kulturës, racës, dhe llojeve të ndryshme të sjelljeve. Kjo mund të ndikojë në ndërgjegjësimin e tyre dhe të formojë stereotipe të paqëndrueshme.
Përpos formimit të përceptimeve e stereotipeve, mediat kanë ndikim negative në emocionet dhe nivelin e stresit të fëmijëve. Përmbajtja e disa mediave, si lajmet ose përmbajtja dramatike mund të shkaktojnë lodhje emocionale, ankth, tension që jo rrallë herë përcillen me sjellje të dhunshme. Prandaj, është shumë i rëndësishëm roli i prindërve në menaxhimin e konsumit të medieve të fëmijëve.
Disa nga këshillat se si të minimizojmë këto efekte negative:
Ndërgjegjësimi dhe udhëzimi
Prindërit mund të ndihmojnë fëmijët të kuptojnë mesazhet që transmetohen përmes mediave, t’i ndihmojnë ata të shqyrtojnë dhe të analizojnë atë që shohin. Kryesisht t’i kushtojnë rëndësi se cfarë informacione u serviren fëmijëve, kontrollimi i materialeve, faqeve te ndryshme që fëmijët tanë ndjekin, këtë mund ta bëni edhe nëpërmjet profileve personale.
Vendosja e kufizimeve dhe rregullave
Përmes vendosjes së orarëve dhe rregullave të qarta rreth konsumit të medieve, prindërit mund të ndihmojnë në kontrollimin e kohës që fëmijët shpenzojnë duke shikuar televizion, duke luajtur video lojra, ose përdorimin e pajisjet elektronike në përgjithësi.
Promovimi i kritikës së medias
Fëmijët mund të ndihen më të aftë për të kuptuar mediat kur prindërit bëjnë diskutime te hapura, analiza më kritike rreth përmbajtjes së mediave, duke i bërë ata të ndërgjegjshem për influencat që ato mund të kenë në mendjet e tyre, përvec tjerash kjo zhvillon edhe mendimin kritik dhe analitik tek fëmijët.
Ndikimi i medias në prindërimin e fëmijëve është i vazhdueshëm dhe i ndjeshëm. Prindërit kanë një rol të rëndësishëm në kuptimin e kësaj bote të përmbytur me media dhe të zhvillojnë një qasje të shëndetshme ndaj saj. Përmes ndërgjegjësimit, komunikimit të hapur dhe rregullave të qarta, ata mund të ndihmojnë në rritjen e aftësive të fëmijëve për të analizuar, vlerësuar dhe përdorur mediat në një mënyrë të përgjegjshme dhe të arsyeshme.
Autore: Gentijana Berisha
