Mirëkuptimi edukativ
Me këtë kemi parasysh mirëkuptimin edukativ mes prindërve, për të realizuar harmonizimin edukativ dhe për të mos gjetur përplasje në metodat e përdorura prej tyre, por të ketë ndërthurje, harmonizim dhe plotësim të njëri-tjetrit në procesin edukativ, për të pasur një rezultat dhe një ndikim sa më pozitiv në ndërtimin e personalitetit të drejtë dhe të fortë tek fëmijët.
Një problem, nga i cili vuajnë shumë prej familjeve, është mungesa e këtij harmonizimi edukativ dhe kjo gjë sjell tek fëmijët devijime, kontradikta në personalitetin e tyre, ose mungesë të shumë prej treguesve të personalitetit të fortë dhe të plotësuar.
Në këtë mënyrë bëhet e domosdoshme, që ta rikujtojmë rëndësinë e harmonizimit edukativ, që bazohet mbi mirëkuptimin e plotë mes burrit dhe gruas për metodat edukative me të cilat punojnë me fëmijët e tyre, në mënyrë që të mos ndodhë asnjë kontradiktë që mund të shkaktojë shkatërrimin e procesit edukativ. Kështu, burri dhe gruaja mund të bien dakord për paratë që u jepen fëmijëve për t’i prishur dhe po ashtu edhe se kush do të jetë ai që do t’ua japë ato atyre, dhe se nuk duhet t’u jepet më shumë se një kufi i caktuar, përveç rasteve të veçanta. Ata mund të bien dakord edhe që nuk do të debatojnë asnjëherë me njëri-tjetrin para syve të fëmijëve për modelin edukativ që përdor burri ose gruaja.
Mund të ndodhë, që babai ta ndëshkojë fëmijën e tij, i cili më pas shkon tek nëna e tij për tu ankuar, e më pas ajo vjen tek burri dhe e kundërshton atë para syve të fëmijës, duke e justifikuar fëmijën dhe se ai nuk e meritonte që të ndëshkohej për atë që ka bërë, ose e kundërta. Në një rast të tillë, ata duhet të bien dakord, se nëse fëmija shkon të ankohet tek babai ose tek nëna, pasi të jetë ndëshkuar nga njëri prej tyre, atëherë prindi tjetër duhet që të qëndrojë në anën e të parit, duke i dhënë të drejtë atij dhe duke i thënë fëmijës: “Ti ke gabuar dhe prandaj e ke merituar këtë ndëshkim”, edhe sikur të mos jetë i bindur me ndëshkimin që i është dhënë fëmijës.
Po ashtu, as burri dhe as gruaja nuk duhet që ta përgënjeshtrojnë apo ta qortojnë, ose t’i korrigjojnë veprimet e njëri-tjetrit para fëmijëve të tyre, por këtë gjë ata duhet ta bëjnë larg syve të fëmijëve.
Këto ishin disa shembuj të harmonizimit eduka- tiv, që ka një ndikim të madh në formimin e fëmijëve.
Përgatiti: Prinderimi.com
Autor: Abdulhamid Bilali, ”Si ta bësh fëmijën tënd yll”
