Bëjini masazh, lërini të vrapojnë në ajër të pastër dhe t’i shfryjnë energjitë e tyre, ndihmojini t’i zvogëlojnë kërkesat dhe trysninë, përkraheni shprehjen e krijimtarisë, bëjini banja të ngrohta, përdorni humorin për t’i zhdramatizuar situatat, përkëdhelini pak më shumë se zakonisht.
Në ditët e sotme, shumë fëmijë çorientohen nga dëshira e fortë e prindërve për t’i parë arritjet e tyre gjithmonë e më shpejt. Ndaj nuk duhet të habiteni që, gjithnjë e më shumë, fëmijët vuajnë nga ulcera gastrike, pagjumësia, ankthi e depresioni. Fëmijët kanë të drejtë t’u respektohen ritmet e tyre. Nuk ka pikë vlere ta stërmundosh një bimë, si e si të nxjerrë lule, e, pasi të shpërthejë, të thahet.
Sot prindërit flasin shumë me fëmijët e tyre dhe kjo është gjë e mirë. Kështu, u mësojmë të vegjëlve si të shprehen, si të ndihen të rëndësishëm dhe të komunikojnë pa ndrojtje. Megjithatë, e folura jo gjithmonë është mjeti më i vlefshëm për të kontrolluar disa prej sjelljeve të tyre, ose për t’i ndihmuar të kenë sjellje të hijshme e të pranueshme.
Pjesa më e madhe e prindërve, druhen se mos i tmerrojnë fëmijët, duke i disiplinuar. Kjo frikë vjen nga fakti se fjala “disiplinë” ka një ngjyrim negativ, që shpeshherë u referohet dënimeve trupore, si të ishte një lloj rreptësie dhe lufte pushteti. Megjithatë, disiplina është vërtet e nevojshme për lumturinë e fëmijëve. Ajo u lejon atyre të mësojnë se deri ku shkojnë caqet e tyre dhe se ku fillojnë ato të prindërve, shmangin rreziqet, mësojnë se si t’u pëlqesh edhe të tjerëve dhe se si të mendosh përpara se të veprosh, në mënyrë që të jetosh në një klimë sa më harmonike.
Nuk bëhet fjalë për ta dënuar fëmijën, por për ta udhëhequr; jo për ta detyruar, por për t’i mësuar disa vlera.
Ja shtatë mënyra për të jetuar në harmoni me fëmijët e vegjël:
1. Të përqendroheni në disa rregulla të rëndësishme.
2. T’ia ushqeni ndjenjat.
3. Të jeni të njëtrajtshëm.
4. T’i ngarkoni përgjegjësi.
5. Të lini që fëmija t’i marrë vendimet e tij të vogla.
6. Të thoni “jo” në mënyrë të qartë.
7. Të jeni më dorëlëshuar në lidhje me gjërat që kanë rëndësi të dorës së dytë.
Përgatiti: Prinderimi.com
Autor: Danielle Laporte, “Vetëvlerësimi i fëmijëve 0-6 vjeç”
