Ministria e Arsimit, Shkencës, Teknologjisë dhe Inovacionit (MASHT), në bashkëpunim me projektin KosEd, ka nisur një seri takimesh regjionale për të prezantuar rregulloren e re për përzgjedhjen dhe emërimin e drejtorëve, zëvendësdrejtorëve, mësimdhënësve dhe personelit tjetër arsimor në institucionet publike edukativo-arsimore parauniversitare, njofton Prinderimi.com
Këto takime synojnë të sjellin më shumë transparencë dhe profesionalizëm në procesin e emërimeve në sistemin arsimor, duke siguruar përzgjedhjen e stafit më të kualifikuar për të udhëhequr dhe për të mësuar gjeneratat e ardhshme.
U.D. drejtori i arsimit parauniversitar, Avni Rexha, theksoi rëndësinë e madhe që ka kjo Rregullore për sistemin arsimor në Kosovë. Ai vuri në pah se rregullorja është një hap kyç drejt përmirësimit të procesit të rekrutimit në institucionet edukativo-arsimore, duke siguruar që të përzgjidhen individët më të kualifikuar për pozitat udhëheqëse dhe mësimore.
“Kjo rregullore synon të sigurojë një qasje më transparente, të drejtë dhe efikase në rekrutim, duke u mundësuar shkollave dhe komunave të kenë më shumë fleksibilitet për të përmbushur nevojat e tyre në kohë reale”, ka thënë u.d. drejtori Rexha.
Ndër të tjera, ai theksoi se, përmes kësaj rregulloreje, synohet gjithashtu të rritet cilësia e arsimit, duke sjellë në sistem mësimdhënës dhe udhëheqës që janë më të përgatitur për t’iu përgjigjur sfidave dhe kërkesave në nivel të klasës dhe shkollës.
Drilon Krasniqi, ekspert i projektit KosEd, theksoi përkrahjen e rëndësishme që projekti KosEd ka ofruar gjatë hartimit dhe zbatimit të rregullores së re. Ai shpjegoi se ekspertët e KosEd kanë bashkëpunuar ngushtë me MASHTI-n për të hartuar udhëzuesit dhe formularët që do të përdoren nga komisionet përzgjedhëse, duke siguruar që procesi i rekrutimit të jetë sa më i lehtë dhe i qartë për të gjithë pjesëmarrësit.
“Kjo përkrahje ka për qëllim të sigurojë që zbatimi i rregullores të jetë i unifikuar në të gjitha komunat dhe institucionet arsimore, duke i pajisur ato me mjetet e nevojshme për të përzgjedhur personelin më të kualifikuar dhe për të garantuar një rekrutim të drejtë dhe transparent”, ka theksuar Krasniqi.
Rezultatet e synuara nga implementimi i kësaj rregulloreje përfshijnë një sistem më të përgjegjshëm dhe efektiv të rekrutimit, me përparësi të tilla si krijimi i listave rezervë për mësimdhënësit e përzgjedhur, mundësia për angazhime të përkohshme të stafit të kualifikuar dhe zëvendësime të shpejta për mësimdhënësit që janë të pamundur të jenë të pranishëm për arsye të justifikuara.
© Prinderimi.com Të gjitha të drejtat e rezervuara.
