Kopjimi dhe manipulimi në provimin e maturës është një problem sistematik, i nxitur nga toleranca dhe inkurajimi i administratorëve dhe mbikëqyrësve.
Kështu u tha në publikimin e raportit analitik mbi “Provimin e Maturës Shtetërore” e cila u publikua sot nga organizata ETEA.
Ky raport synon të ofrojë një vlerësim kritik dhe gjithëpërfshirës të procesit të Provimit të Maturës Shtetërore, duke analizuar efektivitetin, integritetin akademik dhe problemet tjera që ndërlidhen me të.
Ministria e Arsimit, Shkencës, Teknologjisë dhe Inovacionit (MAShTI), ka publikuar rezultatet e Provimit Shtetëror të Maturës, të cilit i janë nënshtruar 18 mijë e 285 nxënës të klasave të dymbëdhjeta në gjithë vendin.
Këtë vit sipas njoftimit të MASHTI-t Provimin e Maturës e kanë kaluar 73.3% e maturantëve.
Arritshmëria mesatare në gjuhë amtare është 58.8%, në gjuhë angleze 54.4% në matematikë 41.1% dhe në lëndën zgjedhore 47.3 %.
“Rezultatet e Provimit Shtetëror të Maturës tashmë janë shpërndarë në shkolla. Provimi i mbajtur më 22 qershor është organizuar në 151 qendra të testimit. Në këtë proces kanë qenë të angazhuar 180 kryetarë të komisioneve të caktuar nga MASHTI, 1500 administrues dhe 1500 mbikëqyrës nga Parlamenti i studentëve të UP-së. Gjatë procesit të administrimit ka pasur tentime për kopjim nga disa nxënës dhe si pasojë e posedimit dhe përdorimit të telefonit janë përjashtuar 79 nxënës”, thuhet në njoftim. /RTK
