Mjekja pediatre Zerina Sheme ka ndarë në rrjetet sociale informacion në lidhje me kollën, e cila është reflex mbrojtës ndaj ndonjë acarimi në fyt apo mushkëri.
Pediatrja thekson se kolla po ashtu mund të shkaktohet edhe nga ndonjë infeksion në hundë ose në fyt.
“Kolla është refleks mbrojtës ndaj një acarimi që mund ekzistojë në fyt apo në mushkëri. Shumë herë kolla mund të shkaktohet nga ndonjë infeksion i vogël në hundë ose në fyt, por një kollitje e papritur mund të shkaktohet nga gëlltitja e një trupi të huaj ose kur grimca të ushqimit kalojnë në rrugët e frymëmarrjes. Në se fëmija ka frymëmarrje të zhurmshme dhe një kollë si e lehura e qenit atëherë fëmija mund të ketë infeksion viral që karakterizohet me ngushtim të rrugës kryesore të frymëmarrjes (laring , trakesë) (Croup). Duhet lajmëruar menjëherë mjeku Në fillimet e sëmundjes kolla zakonisht është e thatë.
Për t’a qetësuar përdoren zgjerues të bronkeve, salbutamol, aerosol me Clenyl, në raste me vështirësi në frymëmarrje rekomandohen kortizonikët me inhalacion. Pas 5-7 ditësh kolla bëhet e njomë, me sekrecione. Prandaj në këtë fazë përdorim sirupe mukolitikë, që i tresin sekrecionet. Për fëmijët nën 1 vjeç nuk rekomandohen sirupe kolle ; vetëm pikat në hundë dhe avujt me ujë fiziologjik nëpërmjet aerosolit.
Kujdes:
Vizita duhet kryer shpejt për fëmijët nën 2 muaj. Kolla shoqërohet me disa shenja të quajtura “shenjat e alarmit”, si:
– frymëmarrje shumë e shpeshtë, e vështirë dhe e zhurmshme.
– Kollë lehëse.
– Mavijosje rreth buzëve”, shkruan mjekja.
