A ju ka ndodhur ndonjëherë që kur keni shkuar në fund të pjesës që po lexonit e keni parë që nuk e keni kuptuar fare? Duket sikur s’e keni lexuar fare materialin! Kjo ndodh shpesh te studentët. Kryesisht ndodh sepse nuk jeni të ndërgjegjshëm nëse po e kuptonit tekstin që po lexonit apo jo. Nuk e keni patur mendjen fare aty dhe as që e keni vënë re. Ja disa strategji që do t’ju ndihmojnë ta shmangni këtë përvojë aspak frytdhënëse, ose të paktën, do t’ju ndihmojë të ndaloni përpara se të keni kaluar shumë faqe në tekst.
BËNI PYETJE DHE PËRPIQUNI T’I JEPNI PËRGJIGJE. Vetëkontrolli përfshin edhe përdorimin e nëntitujve të kapitullit për të bërë pyetje përpara se të lexoni dhe më pas të kontrolloni nëse mund t’u përgjigjeni këtyre pyetjeve ndërsa lexoni. Për shembull, mund të lexoni një kapitull që ka nëntitullin “Reklamat e suksesshme televizive”. Pyetjet që ju vijnë ndër mend përpara se të lexoni këtë pjesë të tekstit mund të jenë: Cilat janë disa karakteristika të reklamave të suksesshme televizive? Cilët janë disa shembuj të reklamave të suksesshme? Duke iu dhënë përgjigje pyetjeve tuaja do të verifikoni menjëherë se sa e keni kuptuar, mbasi të keni lexuar këtë pjesë të kapitullit.
RIFORMULONI IDETË E AUTORIT ME FJALËT TUAJA. Kjo strategji është shumë e rëndësishme në procesin e vetëkontrollit. Idetë riformulojini me fjalët tuaja. Nëse mund t’i përgjigjeni pyetjeve duke riformuluar idetë e autorit me fjalët tuaja, do të kuptoni se e keni kuptuar materialin. Nëse nuk mundeni, atëhere ka vetëm 2 arsye: 1) Pyetja juaj nuk ishte e përshtatshme ose 2) nuk e keni kuptuar pjesën. Do t’ju duhet ose të rishikoni pyetjen në mënyrë që të përfshini edhe informacionin e rëndësishëm në përgjigjen tuaj, ose të lexoni sërish materialin. E mira e kësaj strategjie është se zbuloni vështirësinë për të kuptuar mirë materialin përpara se të arrini në fund të kapitullit. Tani jepini vetes edhe një shans të dytë për të kuptuar pjesën përpara se të ecni më tej me leximin.
Autor: Jill Lewis, “Studimi akademik”
