Histeria e fëmijës në publik: Si duhet të reagojnë prindërit?
Shumë prindër janë përballur me një situatë ku fëmija fillon të qajë, të bërtasë ose të refuzojë të bashkëpunojë në supermarket, park apo restorant. Edhe pse mund të jetë një përvojë stresuese, tantrum-et janë një pjesë normale e zhvillimit të fëmijëve, veçanërisht mes moshës 2 dhe 5 vjeç.
Në ato momente, gjëja më e rëndësishme është të ruani qetësinë. Fëmijët nuk kanë ende aftësinë për të kontrolluar emocionet e tyre, prandaj reagimi i prindit ndikon shumë në mënyrën se si do të përfundojë situata. Flisni me zë të qetë dhe shmangni bërtitjet ose ndëshkimet.
Mos lejoni që shikimet apo komentet e njerëzve përreth t’ju shtojnë presionin. Përqendrohuni te fëmija juaj, jo te opinioni i të tjerëve. Nëse është e mundur, largohuni për pak minuta në një vend më të qetë derisa ai të qetësohet.
Nëse tantrum-i ndodh sepse fëmija nuk mori atë që kërkoi, mos ndryshoni vendimin vetëm për ta ndalur të qarën. Pranoni emocionin e tij, por mbani kufirin. Për shembull, mund të thoni: “E di që je i mërzitur sepse e do atë lodër, por sot nuk do ta blejmë.”
Gjatë krizës, shmangni shpjegimet e gjata. Prisni derisa fëmija të qetësohet dhe më pas bisedoni për atë që ndodhi. Kjo e ndihmon të mësojë mënyra më të shëndetshme për të shprehur emocionet.
Pse ndodhin tantrum-et?
Tantrum-et nuk janë gjithmonë shenjë e mosbindjes. Shpesh ato ndodhin sepse fëmija është i lodhur, i uritur, i mbingarkuar nga zhurmat ose nuk di ende si t’i shprehë ndjenjat me fjalë. Truri i një fëmije të vogël është ende në zhvillim dhe aftësia për të kontrolluar emocionet nuk është formuar plotësisht. Për këtë arsye, ajo që prindit mund t’i duket një reagim i tepruar, për fëmijën është një emcion shumë i madh që ai nuk di ta menaxhojë.
Pasi situata të ketë kaluar, mos e turpëroni fëmijën dhe mos ia kujtoni vazhdimisht atë që ndodhi. Në vend të kësaj, ndihmojeni t’i emërtojë emocionet e tij duke i thënë, për shembull: “Ishe shumë i zemëruar sepse nuk mund ta merrje atë që doje.” Më pas tregojini se herën tjetër mund të përdorë fjalët, të marrë frymë thellë ose të kërkojë ndihmë nga ju. Këto biseda të qeta janë ato që ndërtojnë aftësitë emocionale afatgjata.
Për të parandaluar tantrum-et:
1.Planifikoni daljet kur fëmija është i pushuar dhe i ushqyer
2.Njoftojeni paraprakisht për planet dhe
3.Mbani me vete një ushqim të lehtë ose një lodër të preferuar.
Këto hapa të thjeshtë mund të zvogëlojnë ndjeshëm mundësinë e shpërthimeve emocionale.
Mbani mend se një tantrum në një vend publik nuk do të thotë se jeni prind i keq. Është një fazë normale e zhvillimit dhe një mundësi për ta ndihmuar fëmijën të mësojë të njohë dhe të menaxhojë emocionet e tij. Me durim, qëndrueshmëri dhe mirëkuptim, këto situata bëhen më të lehta me kalimin e kohës.
