Kam qenë gjithmonë kureshtar të di nëse kemi qenë ne dikur ata që notonin në fantazitë fëmijërore? Si është e mundur që harrojmë fëmijërinë tonë? Si do të ishte njerëzimi nëse nuk do të ekzistonte forca e fantazisë? Forca e fantazisë është përcaktuese në zhvillimin e njerëzimit, po aq sa edhe në zhvillimin individual.
Fëmijët kanë aftësi krijuese të fantazive në mënyrë të pabesueshme. Një fëmijë i vetëm, mund të luajë për orë të tëra me një fëmijë tjetër ta bërë shok në fantazinë e tij. Ai mund të bisedojë me sendet, pemët. Paçka se tani i kemi harruar, edhe ne kemi fantazuar në fëmijërinë tonë në masën e aftësisë për të fantazuar.
Qëndrimet abuzuese me forcën e fantazisë së fëmijës: Ashtu si forcat e tjera edhe forca e fantazisë zhvillohet ose atrofizohet në varësi të qasjes ndaj fëmijërisë sonë. Me mendjen prej të rrituri ne përpiqemi të kemi një kontroll mbi botën e fantazisë së fëmijës. Ne ia ndalojmë atij ëndrrat që na duken të palogjikshme. Në këto kushte fëmija ose nuk i ndan më me ne fantazitë e tij, ose mendon se ka diçka të çuditshme te vetja. Ka raste kur ne tallemi me ëndrrat e fëmijëve. Mendoni sikur t’ua bëjnë juve këtë, si do të ndiheshit?
Ëndërrimi zhvillon krijimtarinë e njeriut. Nëse në fëmijërinë tonë janë tallur me ëndrrat, nuk do të kemi mundësi të shpalosim mjaftueshëm krijimtarinë. Çdo njeri ka një potencial të pasur krijimtarie; për fat të keq shumë njerëz nuk arrijnë të vërejnë këtë. Nuk e vërejnë sepse kanë hequr dorë nga ëndërrimi. Të jeni të sigurt se fëmijët e penguar të ëndërrojnë, në të ardhmen do të shndërrohen në individë të pamjaftueshëm që nuk do të mund t’u bëjnë ballë problemeve.
Qëndrimet që zhvillojnë forcën e fantazisë së fëmijës:
Në fakt ajo që duhet të bëjnë prindërit në këtë çështje është shumë e thjeshtë: të respektojnë ëndrrat e fëmijëve e të përfshihen në ëndërrimet e tyre. Sado e marrë mund të na duket, kjo është e shëndetshme. Në fakt edhe fëmijët janë të vetëdijshëm se ëndërrimet nuk janë të vërteta. Kjo është vetëm një lojë për ta.
Por, ndonjëherë në vetëdijen e fëmijëve “fantazia” dhe “e vërteta” janë të pandashme. Megjithëse ka ndodhur shumë rrallë, ka fëmijë që, pasi kanë parë filmin Supermeni, janë hedhur nga dritarja me mendimin se mund të fluturojnë. Nëse përfshihemi në fantazitë e fëmijëve, kemi mundësinë të vëzhgojmë nëse përmbajnë rrezik apo jo. Nëse vërejmë ndonjë rrezik, është e dobishme të konsultohemi me një specialist.
