Zhvillimi teknologjik anembanë globit ka bërë që me hapa gjigantë të ndryshojë edhe mënyra e perceptimit të teknologjisë, madje edhe togfjalëshi ka pësuar ndërrime, e normalisht edhe siç pritej, ka hapur debate.
Anash të gjithave, inteligjenca artificiale është zhvillimi më i ri dhe më i vjetri në botë. Kjo sepse inteligjencë pretendohet se ka pasur gjithherë, por artificialja ndonëse është plasuar vonë (lexo: kryesisht në dekadën e fundit), ka marrë hov dhe po formësohet dita-ditës.
Roboti virtual i plasuar nëntorin e 2022-s, ChatGPT, i punuar nën përkujdesjen e shqiptares Mira Murati, ka hapur debat, që kësodore, nuk besohet se do të mbyllet ndonjëherë.
Thjeshtësisht, ky robot është aplikacion softuerik e i punuar për të imituar biseda që zhvillohen mes njerëzve, në varësi prej kërkesave dhe qëllimeve të tyre.
Miliarda njerëz në botë tashmë kanë qasje në këtë aplikacion, e miliona të tjerë e përdorin në baza ditore. Ai po përjeton zgjatim në botën virtualo-teknologjike, duke bërë që kombësi, grupe, komunitete, shtete e ekipe ta përdorin për qëllime publiko-private.
Por, ku qëndron aftësia dhe nevoja e ChatGPT-së për të shërbyer në aspektin akademik. Njohësit janë të ndarë në dy kampe: optimistë dhe dyshues.
Roboti virtual mund të shfrytëzohet në mënyrë perfekte për të marrë informacione rreth kërkimeve shkencore, por që ende në shkencën teorike s’mund të citohet për shkak të dykuptimësisë dhe (mos)vërtetësisë së informacioneve që ofrohen me shpejtësi dhe me bollëk. Kjo e thënë nga kompania punuese, OpenAI, ka ndikuar që të rritet përdorimi i tij, por jo domosdoshmërisht edhe besimi në të.
Christine Elgersma, redaktore e uebfaqes për edukim, “Commonsense”, ka ngrehur dyshimin nëse robotët “do t’i pushtojnë objektet mësimore pas shpërndarjes së ChatGPT-së”, duke argumentuar se leximi i teksteve shkollore dhe të pakësohet, me idenë që nxënësit mund të orientohen kah informatat “fastfood”.
Pra, nisur nga kjo, ChatGPT konsiderohet i rëndësishëm për të fituar një bazë të mirë mbi një temë të caktuar, mirëpo assesi të mos përdoret zyrtarisht si burim kredibil i informatës.
Debati do të vijojë po aq sa edhe dyshimet mbi ChatGPT-në.
Vetë roboti rekomandon në vazhdimësi që “informacionet janë sipërfaqësore dhe të paplota”, duke ftuar që për tema përkatëse, të konsultohen burimet zyrtare dhe literaturat përkatëse.
Ende s’ka matje sa ka zënë vend shfrytëzimi i ChatGTP-së në shkollat kosovare, por një gjë e tillë do të ishte shumë dobiprurëse për të studiuar e analizuar ndikimin dhe rolin e tij.
Prinderimi.com
