Zakonet proshoqërore
Sa më i vogël është fëmija, aq më i shqetësuar është prindi. Bebja ka shumë nevojë për mbrojtje, sepse nuk është në gjendje ta bëjë vetë këtë. Për sa i përket zbuluesit, duhet po aq mbrojtje, për më tepër që në këtë fazë përpiqet të na kenë krejt për vete. Megjithëkëtë, nuk duhen harruar edhe marrëdhëniet me të tjerët. Vendimmarrësi, nga ana e tij, ka nevojë të mësojë t’i kontrollojë impulset, veçanërisht duke e konsideruar veten si pjesë të një grupi. Dhe, në fund, magjistari, i cili është një mik shumë interesant, sepse zhytet kokë e këmbë në botën imagjinare. Ka një etje të pashtershme komunikimi dhe dëshiron shumë të luajë dhe të sajojë.
Është e rëndësishme të bëjmë të mundur që bebja të ketë kontakte me çdo lloj njeriu: rreth sa më të gjerë familjar, miq, të afërm, të panjohur, fëmijë të lagjes, kushërinj e kushërira, fëmijë të panjohur etj.
Fëmijët mund të jenë të 3 tipave: 1) të turpshëm; 2) që krijojnë lehtësisht marrëdhënie; 3) të paparashikueshëm. Një pjesë e tipit i faturohet kodit gjenetik, një pjesë imitimit të sjelljes së prindërve dhe një pjesë edhe përvojave paraprake (tronditje të thella, shtrime në spitale, frikëra etj.)
PËR TA NDIHMUAR JETËN SHOQËRORE TË FËMIJËS SË TIJ, ÇDO PRIND DUHET TA VËZHGOJË JETËN E VET SHOQËRORE
- me familjen (prindër, vëllezër dhe motra);
- me fëmijët;
- me burrin ose gruan;
- në vendin e punës;
- me miqtë;
- me njerëz të tjerë ose në vende të tjera (në mbledhjet shkollore, në veprimtari sportive etj.).
Nëse flisni për jetën tuaj shoqërore, për miqtë ose për të afërmit tuaj në mënyrë pozitive, nëse parashikoni që fundjava e ardhshme, të cilën do ta kaloni me familjen do të jetë shumë e këndshme, ose nëse bëheni gati gjithë qejf për të shkuar në një mbrëmje vallëzimi, edhe fëmijët tuaj do të kenë dëshirë të shkojnë tek të tjerët dhe do t’i presin këto raste me shumë kënaqësi.
Në të kundërt, nëse ankoheni vazhdimisht për kolegët e punës, nëse ju prishet humori kur dikush ju thotë se do të vijë t’ju takojë, ose nëse i shmangni të gjitha rastet për të dalë, fëmijët tuaj do të mësojnë se nuk duhet t’u zëmë besë marrëdhënieve me të tjerët dhe do të përpiqen t’u bëjnë bisht.
Kjo nuk do të thotë se duhet ta ndryshoni krejt natyrën tuaj, por thjesht që të jeni të vëmendshëm në ndikimin që sjelljet tuaja kanë në jetën shoqërore të fëmijëve. Edhe bebet e kuptojnë gjuhën e pafolur!
Përgatiti: Prinderimi.com
Autor: Danielle Laporte, “Vetëvlerësimi i fëmijëve 0-6 vjeç”
